لەسەر پۆستی سەرۆکوەزیران هۆشدارییەک دەدرێت

عەلی موسەوی، پەرلەمانتاری هاوپەیمانی دەوڵەتی یاسا، دووپاتیکردەوە، کە ئەوەی عێراق و ناوچەکە ئێستا بەخۆوەی دەبینن، دەکەوێتە چوارچێوەی پرۆژەی " ئیسرائیلی گەورە".

موسەوی لە لێدوانێکدا بۆ پرۆگرامی بیست کە لە کەناڵی سومەرییە پەخش دەکرێت، دەڵێت" دوو کاندید لە هاوپەیمانی دەوڵەتی یاسا بڕیارەکانی لێپرسینەوەیان گرتەوە، بەڵام تانەکانیان پەسەند کرا، ئاماژەی بەوەشدا کە " ئەوەی لەسەر شەقام باس دەکرێت سەبارەت بە پێکهێنانی حکومەتی فریاگوزاری تەنها قسەی ناواقیعییە".
 
وتیشی" سەرۆکی هاوپەیمانی دەوڵەتی یاسا، نووری مالیکی، هەرگیز باسی هەڵوەشاندنەوەی هەڵبژاردنەکانی داهاتووی نەکردووە، بەڵکو جەختی لەسەر پێویستی ئەنجامدانیان کردووەتەوە".

 جەختیشی کردەوە کە" پۆستی سەرۆک وەزیران بۆ ماوەی دوو سەدەی داهاتوو لە دەستی پێکهاتەی شیعەدا دەمێنێتەوە، و وەرگرتنەوەی جگە لە خەونێکی مەحاڵ وەک (خەونی ئیبلیس بۆ چوونە بەهەشت) هیچی تر نییە".
 
موسەوی ڕوونیکردەوە کە " مەرجەعییەت، ڕاسپاردەی هەموو شیعەکانی کردووە بەشداری لە هەڵبژاردنەکانی داهاتوودا بکەن، ئەمەش دەبێتە هۆی بەشداریکردنێکی بەرفراوان".
 
ئاماژەی بەوەشدا؛ “سەرۆک وەزیرانی ئێستا محەمەد شیاع سوودانی کوڕی هاوپەیمانی دەوڵەتی یاسا بووە”.
 
لەدرێژەی قسەکانیدا موسەوی وتی: “بە هەموو هێزێکەوە هەوڵ دەدەین مالیکی بگەڕێتەوە بۆ سەرۆکایەتی وەزیران، چونکە گەل هێشتا بە(باوکی نان) ناوی دەبات بەهۆی ئەوەی لە ساڵانی حوکمڕانیدا پێشکەشیکردووە”.
 
وتیشی" چوارچێوەی هەماهەنگی یەکگرتوو دەمێنێتەوە و دوای هەڵبژاردنەکان بەردەوام دەبێت، جا بە یەک لیست بێت یان چەند لیستێک".