کوردستان

دەستبەسەر 60 موڵكی كۆمپانیای نالیاو چاڤیدا دەگیرێت

نهانیوز-هەواڵەکان

بەڕێوەبەرایەتی گشتی بانكە بازرگانییەكان بڵاویكردووەتەوە، لەسەر داوای وەزارەتی دارایی و ئابووری دەستگیرا بە سەر ژمارەیەك موڵكی كۆمپانیای نالیا و چاڤی.

 لەزیادكردنێكی ئاشكرادا سەرجەم ئەو موڵكانەی كۆمپانیای نالیاو چاڤی دەفرۆشرێت كە دەستیانبەسەرداگیراوە و  ژمارەیان ٦۰ موڵكە. 

قەرزەكانی وەزارەتی دارایی و ئابووری لەسەر كۆمپانیای نالیا  گەیشتووەتە نزیكەی ٩٢ ملیار دینار.

پاڵپشت بە بڕیاری سەرۆكایەتی دادگای پێداچوونەوەی هەرێمی كوردستان و دەستەی شارستانی تێهەڵچوونەوە ژمارە ( ٩٠ / دەستەی شارستانی تێهەڵچوونەوە / ٢٠٢١ / ڕاستكردنەوە ) لە ڕێكەوتی ( ٢٠٢١/١٠/٢٠ ) تایبەت بە یەكلایی كردنەوەی دۆسیەی قەرزەكانی كۆمپانیای نالیا لە بەرژەوەندی وەزارەتی دارایی و ئابووری ، وە ئاماژە بە بڕیاری بەڕێوەبەرایەتی جێبەجێكردنی دووەمی سلێمانی ژمارە ( ٢٠٢٤/٦٨٤ ) لەڕێكەوتی ( ٢٠٢٤/٩/٢٢ ) تایبەت بە دانانی نیشانەی گلدانەوە ( حجز ) لەسەر سەرجەم موڵكەكانی كۆمپانیای نالیا و كۆمپانیای چاڤی.

وە ئاماژە بەبڕیاری داگای تێهەڵچوونەوەی ناوچەی سلێمانی ژمارە ( ٧٣٢/پ/٢٠٢٤ ) لەڕێكەوتی ( ٢٠٢٤/١١/٢٦ ) تایبەت بەڕاستاندنی بڕیاری ئاماژە بۆكراوی جێبەجێكاری داد لە سلێمانی لەبەرژەوەندی وەزارەتی دارایی و ئابووری وە ڕەتكردنەوەی تانەی پێداچوونەوەی كۆمپانیای نالیا.
وەزارەتی دارایی و ئابووری لە ڕێگای بەڕێوەبەرایەتی ناوبراو هەڵدەستێت بە فرۆشتنی موڵكە دەستبەسەرداگیراوەكانی كۆمپانیای نالیاوچاڤی كە ژمارەیان ( ٦٠ ) موڵكە و پێكهاتووە لە چەندین پارچە زەوی و هۆتێل  و كافتریا و كابینەی گەشتیاری و هتد.....كە پێشتر دەستی بەسەرداگیراوە بەمەبەستی وەرگرتنەوەی سەرجەم قەرز و سوودە كەڵەكەبووەكانی كە لەئێستادا گەیشتووەتە بڕی ( ٩١٫٧٦٠٫٦٦٫٣٥٠ ) ملیار دینار.

شایەنی باسە وەزارەتی دارایی و ئابووری هەرێمی كوردستان لە دوای دەستبەكاربوونی كابینەی نۆیەم لەسەر ڕاسپاردەی جەنابی وەزیر بەشێوەی چڕوپڕ كاری لەسەر ئەو دۆسیەیە كردووە، دواجار لەساڵی ( ٢٠٢١ ) دوای بردنەوەی دۆسیەیەكی یاسایی لەكۆمپانیای نالیا لەلایەن وەزارەتی دارایی و ئابوری و ئەنجامدانی سەرجەم ڕێكارەكان، لەلایەن لیژنەیەكەوە چوار پارچە زەوی دانرابوو بەشێوەی زیادكردنی ئاشكرا بفرۆشرێت، بەڵام دواتر دەركەوت ئەو پارچە زەویانە لە بنەڕەتدا بۆ سەوزایی و خزمەتگوزاری تەرخان كراوە و ناتوانرێت ڕەگەزەكانیان بگۆڕدرێت و بخرێنە زیادكردنی ئاشكراوە، وەخەمڵاندنێكی نادروست بۆ نرخەكانیان كرابوو وە ڕێگری یاسایی هەبوو بۆ فرۆشتنیان ، بۆیە بەبڕیاری بەڕێز وەزیری دارایی و ئابووری سەرجەم پرۆسەكە ڕاگیراو جارێكی تر لەلایەن تیمێكی پسپۆڕەوە كار لەسەر دۆسیەكە كرایەوە و سەرجەم ئەو موڵكانەی كە شایستەی فرۆشتنن نیشانەی گلدانەوەیان خرایە سەر.

دواجار لەسەر داوای (بانكی سلێمانی یەك) سەر بەبەڕێوەبەرایەتی گشتی بانكە بازرگانییەكانی  وەزارەتمان و دوای چەندین جار ئاگاداركردنەوەی كۆمپانیای نالیا بۆ گەڕاندنەوەی قەرزەكان و پابەند نەبوونی لایەنی پەیوەندیدار، وەزارەتمان بەمافی یاسایی خۆی دەزانێت لە ڕێگای زیادكردنی ئاشكراوە سەرجەم ئەو موڵكانە بفرۆشێت كە نیشانەی گلدانەوەیان خراوەتە سەر و داواكارین هەركەس و لایەنێك ئارەزوومەندە بەشداری لەو زیادكردنەدا بكات دوای بڵاوبوونەوەی ئاگاداریەكە لە ڕۆژنامەی فەرمی دەتوانێت ڕێكارە یاسایی و كارگێڕیەكان جێبەجی بكات و بەشداری لە پرۆسەكەدا بكات.

بەڕێوەبەرایەتی گشتی بانكە بازرگانییەكان/ وەزارەتی دارایی و ئابووری
٢٠٢٥/٨/٣١
 
5کاتژمێر پێش ئێستا
زیاتر...
Copyright © All rights reserved.