بافڵ تاڵەبانی کۆبوونەوەیەک لەقازانجی هەرێم دەکات

نها نیوز - هەواڵەکان

بافڵ تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە حەمید شەتری، سەرۆکی دەزگای موخابەراتی عێراق کرد و، راشیگەیاند "دابینکردنی ژیانێکی ئارام و دوور لە تیرۆر بۆ خەڵکەکەمان کاری لەپێشینەمانە".

نوسینگەی سەرۆکی یەکێتیی نیشتیمانیی کوردستان بڵاویکردووەتەوە، لە کۆبوونەوەکەدا  دۆخی ئەمنیی عێراق و ناوچەکە گفتوگۆی لەسەر کرا و جەخت لە فراوانکردنی هەماهەنگی و هاریکارییە هەواڵگرییەکان لە نێوان هەرێمی کوردستان و عێراق کرایەوە، لەپێناو زاڵبوون بەسەر ئاڵنگارییە ئەمنییەکان و پاراستنی ئاسایش و سەقامگیری لە وڵاتدا.

ئەوەش هاتووە "بافڵ تاڵەبانی گرنگیی پێویستیی پەیوەندی سەرجەم دەزگا هەواڵگریی و ئەمنییەکانی دووپاتکردەوە و وتی؛ دابینکردنی ژیانێکی ئارام و دوور لە تیرۆر بۆ خەڵکەکەمان کاری لەپێشینەمانە".

هەروەها بە کاری پێکەوەیمان دەتوانین باشتر رووبەڕووی مەترسییە ئەمنییەکان ببینەوە و هیچ دەرفەتێکیش بۆ تیرۆریستان نەهێڵینەوە.

سەرۆکی یەکێتیی رایگەیاند، هەرکەسێک لە هەر پلە و پۆستێکدا بێت، یاساشکێنی بکات و ژیان و سەقامگیریی خەڵکە خۆشەویستەکەمان بخاتە مەترسییەوە، دەبێت یاسای بەسەردا بچەسپێنرێت و یاسا سەروەر بێت.