قوباد تاڵەبانی: کورد بە درێژایی مێژوو پێشوازی لە هەر دەستێک کردووە کە بۆ ئاشتی درێژکرابێت

نهانیوز-هەواڵەکان

جێگری سەرۆکی حکومەت دوابەدوای بەشداریکردنی کە کۆنفرانسی هاوپەیمانی سۆسیال دیموکراتی وڵاتانی عەرەبی پەیامێکی بڵاوکردەوە.

ئەمڕۆ پێنجشەممە 28ی ئاب قوباد تاڵەبانی جێگری سەرۆکوەزیرانی هەرێمی کوردستان لە لاپەڕەی تایبەتی خۆی لە تۆڕە کۆمەڵایەتییەکان رایگەیاند "لە کۆنفڕانسی هاوپەیمانیی سۆسیال دیموکراتی وڵاتانی عەرەبی لە سلێمانی جەختم کردەوە ناوچەکەمان بەبێ دیموکراسی و دابینکردن و رێزگرتن لە مافەکانی هەموو پێکهاتە جیاوازەکان و هەروەها بەبێ پێداچوونەوە بە شێوازی حکومڕانی پێش ناکەوێت و ئاشتی و خۆشگوزەرانی بۆ گەلانی ناوچەکە بەدی نایەت".

جێگری سەرۆک وەزیرانی هەرێم دەشڵێت" کورد کلتورێکی ژیاندۆست و ئاشتیخوازی هەیە، لەگەڵ ئەوەی قەت ماندوونابێت لە هیچ هەوڵ و خەباتێک بۆ دابینکردنی مافە رەواکانی".

قوباد تاڵەبانی ئاماژەشی بۆ ئەوە کردوە کە "کورد بە درێژایی مێژووش پێشوازی لە هەر دەستێک کردووە کە بۆ ئاشتی درێژکرابێت"،دەشڵێت" هەر بۆیە نەک هەڕەشە نییە بۆ هیچ لایەک، بەڵکو دەرفەتێکی گەورەیە بۆ چەسپاندنی دیموکراسی و پێکەوەژیان لە هەموو ناوچەکەدا".