هاوسەرۆکی دەمپارتی لە بارەی زیندانیانی سیاسی زانیاریی نوێ ئاشکرا دەکات

نهانیوز - هەواڵەکان

تونجەر باکرهان، هاوسەرۆکی پارتی دەم گوتی، زۆر گرنگە ئەمڕۆ لە سلێمانی باسی ئاشتی دەکەین و ئەگەر پرۆسەی ئاشتی سەربگرێت سیاسەتی نکۆڵیکردن کۆتایی پێدێت و زیندانیکراوان ئازاد دەبن. گوتیشی، 25 ملیۆن کورد لە تورکیا ناتوانن بە کوردی قسە بکەن و ئومێدمان بە پرۆسەکە هەیە و خەباتی بۆ دەکەین.

تونجەر باکرهان، هاوسەرۆکی پارتی دەم لەمیانی پانێڵێکدا لە کۆنفرانسی هاوپەیمانیی سۆسیاڵ دیموکراتی وڵاتانی عەرەبی لە سلێمانی رایگەیاند، زۆر گرنگە ئەمڕۆ هەمووان لە سلێمانی باسی ئاشتی و پرۆسەی چارەسەری دەکەن.

باکرهان لەبارەی رەوشی کورد لە باکوروی کوردستان و تورکیا گوتی، دەیان هەزار سیاسیی کورد، تەنیا بەهۆی ئەوەی بەرگرییان لە مافی گەلەکەیان کردووە و خەباتیان بۆ زمان و ناسنامەی کوردی کردووە، لە زینداندان.

وتیشی، ئەگەر پرۆسەی ئاشتی سەربگرێت، سیاسەتی نکۆڵیکردن کۆتاییدێت و زیندانیکراوان ئازاددەبن.

تونجەر باکرهان، هاوسەرۆکی پارتی دەم گوتیشی، "ماوەی 100 ساڵە گەلانی رۆژهەڵاتی ناوەڕاست دەچەوسێندرێنەوە، بەڵام ئێستا لە قۆناغێکی نوێداین، کە گەلانی ناوچەکە دەیانەوێت بە ئازادی و یەکسانیی بژین".

ئەوەشی وت، "لە تورکیا بە بانگەوازەکەی ئۆجەلان پرۆسەی چارەسەریی دەستیپێکردووە. ئێمە دەمانەوێت کۆتایی بە سیاسەتی نکۆڵیکردنی 100 ساڵە بێت و کۆمارێکی دیموکرات بونیادبنرێت. ئەگەر ئەم پرۆسەیە سەربگرێت، سیاسەتی نکۆڵیکردن کۆتایی دێت، کارە نایاساییەکانی لەدژی ئۆپۆزسیۆن و کورد کۆتاییان دێت و زیندانیکراوان بە ئازادیی خۆیان شاد دەبنەوە."

تونجەر باکرهان، هاوسەرۆکی پارتی دەم لەمیانی پانێڵێکدا لە کۆنفرانسی هاوپەیمانیی سۆسیاڵ دیموکراتی وڵاتانی عەرەبی لە سلێمانی و لە بەردەوامیی گوتەکانیدا رەخنەی لە بەردەوامیی سیاسەتی حکومەتی تورکیا بەرامبەر کورد گرت و گوتی، تاوەکو ئێستا ملیۆنان کورد لە باکووری کوردستان و تورکیا ناتوانن بە زمانی خۆیان قسە بکەن.

ئاماژەی بەوەشکرد، تەنانەت لەو لیژنە پەرلەمانییەی بۆ پرۆسەی ئاشتی دروستکراوە، رێگە بە دایکانی کورد نەدرا بە زمانی خۆیان قسە بکەن.

باکرهان، جەختیلەوەشکردەوە، سەرەڕای سەختییەکان و بەردەوامیی ئەو بۆچوونەی کە دان بە کورددا نانێت، ئومێدیان هەیە و لە خەباتەکەیان بۆ سەرخستنی پرۆسەکە بەردەوامدەبن.

تونجەر باکرهان، هاوسەرۆکی پارتی دەم باسی ئەوەشیکرد، "تاوەکو ئێستا بەڕێز ئۆجەلان، کە ئەندازیاری پرۆسەکەیە لەژێر گۆشەگیرییدایە، هێشتا سیاسەتی نکۆڵیکردنی 100 ساڵە بەردەوامە، بەڵام هەموومان بەردەوامدەبین لەو خەباتەی کە دەستمانپێکردووە".

باکرهان راشیگەیاند، "من ناتوانم بە کوردی قسە بکەم، نزیکەی 25 ملیۆن کورد لە تورکیا ناتوانن بە زمانی خۆیان قسە بکەن و قەدەغەیە. تەنانەت لە لیژنە پەرلەمانییەکە رێگە بە دایکێکی ئاشتی نەدرا بە کوردی قسە بکات و ناچار بە تورکی قسەیکرد، ئیتر کاتی ئەوەیە دەوڵەتی تورکیا لەو دووڕووییە رزگاری بێت."

 هاوسەرۆکی پارتی دەم باسی ئەوەشیکرد، "لەئێستادا هەزاران سیاسیی کورد لە زیندانەکانی تورکیادان، ئەگەر پرۆسەی ئاشتی و دیموکراسی جێبەجێ بکرێت تورکیا لە دەسەڵاتی تاکڕەویی دەردەچێت و کار بۆ دروستکردنی کۆمارێکی دیموکراسی دەکرێت ".

تونجەر باکرهان ئاماژەی بەوەشکرد، "ئەگەر پرۆسەی ئاشتی و دیموکراسی جێبەجێ بکرێت کاریگەریی لەسەر رۆژئاوای کوردستانیش دەبێت و داوای پێکهێنانی سیستمێکی دیموکراسی بۆ سووریا دەکەین و فەڵەستینییەکان باسی کورد ناکەن، بەڵام ئێمە هەمیشە باسی ئەوان دەکەین و پشتیوانیانین".