نهانیوز-هەواڵەکان
وتەبێژی یەکێتی دەڵێت"پرسی مووچە بەرەو کۆتایی دەچێت"، لەبارەی ڕووداوەکانی هەفتەی رابردووی سلێمانیش دەڵێت " ئەوپرسە ئێستا لەبەردەم دادگا و دەسەڵاتی هەرێمە، هیوادارین یاسا سەروەربێت و حکومەتی هەرێم بڕیارەکانی دادگا جێبەجێ بکات".
ئەمڕۆ چوارشەممە 27ی ئاب کاروان گەزنەیی، وتەبێژی یەکێتی لە کۆنفرانسێکی ڕۆژنامەوانیدا ڕایگەیاند" کۆنفرانسێکی گرنگ لە سلێمانی بەڕیوەدەچێت و یەکێتی وەک حزبێکی سەرەکی بەشدارە، و سەرۆکی یەکێتی یەکیکە لە دەستەی بەڕیوەبەران و دانانی ئەم کۆنفرانسە".
لەبارەی پرسی مووچەوە، کاروان گەزنەیی ڕایگەیاند" یەکێتی وەک هێزێکی سیاسی بەشدار لەم پرسەدا هەوڵی باشی داوە بۆ دەستەبەرکردنی سەرجەم شایستەکانی هەرێم، و پێشتریش سەرۆکی یەکێتی بەنوێنەرایەتی سەرجەم لایەنەکان چۆتە بەغدا و هەوڵی جدی بۆ ئەم مەبەستە داوە".
ڕاشیگەیاند" وەک یەکێتی هاوخەمین لەگەڵ ئەم بابەتە و ئومیدەوارین پرسەکە بەرەو چارەسەری کۆتایی بچێت، و هیوادارین هەردوو حکومەتی هەرێمی کوردستان و عێراق بگەنە ڕێککەوتنی کۆتایی لەم بارەیەوە، چونکە مووچە مافێکی سەرەتایی و سەرەکی مووچەخۆرانە و دەبیت بۆیان دەستەبەر بکرێت".
سەبارەت بە ڕووداوەکانی هەفتەی ڕابردووی سلێمانی، کاروان گەزنەیی ڕایگەیاند" ئەوپرسە ئێستا لەبەردەم دادگا و دەسەڵاتی هەرێمە، هیوادارین یاسا سەروەربێت و حکومەتی هەرێم بڕیارەکانی دادگا جێبەجێ بکات، وە داواکارین هەموو دەستوەردانیکی حزبی لەم بابەتەدا دووربخرێتەوە و یاسا کاری خۆی بکات".