نها نیوز – هەواڵەکان
ئەنجوومەنی سەركردایەتی یەكێتیی راگەیەندراوێکی لەبارەی کۆبوونەوەکەی ئەمرۆ بڵاو کردەوە و تەئكیدی لەسەر ستراتیژی كوردستانی و پێكەوەیی بۆ رێككەوتن لەگەڵ حكومەتی فیدڕاڵ كردەوە و دەستخۆشی لە هەوڵەكانی سەرۆك بافڵ و تیمی كوردستانی كرد لە چارەسەركردنی ئەو پرسە.
دەقی راگەیەندراوی كۆبوونەوەی ئەنجوومەنی سەركردایەتی :
ئەمڕۆ (١٦-٧-٢٠٢٥) ئەنجوومەنی سەركردایەتی یەكێتیی نیشتمانیی كوردستان بە سەرپەرشتی سەرۆك بافڵ جەلال تاڵەبانی ، سەرۆكی یەكێتیی نیشتمانیی كوردستان لە هۆڵی كۆبوونەوەكانی مەكتەبی سیاسی لە سلێمانی كۆبووەوە .
كۆبوونەوە تەرخانكرا بۆ گفتوگۆكردن لەسەر دواپێشهاتەكانی پرسی مووچەو گوزەرانی هاوڵاتیانی هەرێمی كوردستان و دیاردەی دزێوی پەلاماردانی شوێنە جیاجیاكانی كوردستان بە درۆن و بە ئامانجگرتنی دامەزراوە ئابوورییەكان .
سەركردایەتی یەكێتی بە توندی ئیدانەی ئەو جۆرە رەفتارە دوژمنكارانەی كرد كە مەرام لێی زیان گەیاندنە بە ئاسایش و ئارامی و ئابووری وڵاتەكەمان و گوشارخستنە سەر قەوارەی هەرێم .
كۆبوونەوە داواشیكرد حكومەتی فیدڕاڵ بەرپرسیارێتی نیشتمانیی و رەسمی و دەستووریی خۆی راپەڕێنێت بەرامبەر ئەمنیەتی هاوڵاتیانی كوردستان و ئەوانەی هەڵدەستن بەو تاوان و پێشێلكاریانە رووبەڕووی دادگایان بكەنەوە و رێگا نەدەن درزی ئەمنی قووڵ بێتەوە.
بەشێكی تری كۆبوونەوەی ئەنجوومەنی سەركردایەتی تەرخانكرا بۆ گفتوگۆكردن لەسەر دۆخی هەستیار و خراپی ژیان و گوزەرانی كۆمەڵانی خەڵك، بە تایبەت پێویستی رێككەوتن لەگەڵ بەغدا و دابینكردنی مووچەی فەرمانبەران و بوژاندنەوەی بازاڕ و ئاوەدانی .
كۆبوونەوە تەئكیدی لەسەر ستراتیژی كوردستانی و پێكەوەیی بۆ رێككەوتن لەگەڵ حكومەتی فیدڕاڵ كردەوە و دەستخۆشی لە هەوڵەكانی سەرۆك بافڵ و تیمی كوردستانی كرد لە چارەسەركردنی ئەو پرسە.
سەرۆك بافڵ جەلال تاڵەبانی وێڕای دەستخۆشی لەهەوڵەكانی چارەسەركردنی كێشەی مووچە و ئومێدی سەرخستنی هەوڵەكان و پابەندبوونی هەموولایەك پێوەی روونیكردەوە ئەوەی بەدەست هاتووە بەرهەمی یەكڕیزی و پێكەوەیی هەڤاڵانی سەركردایەتیی یەكێتییەكەمانە كە پشتیوانمانن و دەستكراوەیان كردووین بۆ داكۆكی زیاتر لە ویست و گوزەرانی كۆمەڵانی خەڵكی كوردستان. ئاماژەی بۆ ئەوەشكرد بە پێكەوەییمان و یەكڕیزمان لە هەرێم دەتوانین داكۆكی لە شایستە داراییەكانی خەڵكەكەمان بكەین و ئارامی و ئاسایشی وڵاتەكەمان باشتر بپارێزین .