نها نیوز – هەواڵەکان
سەرچاوەیەکی باڵا لە ئەنجومەنی وەزیرانی هەرێم، سەبارەت بەرێککەوتنی هەرێم و بەغدا رایگەیاند، رەشنووسى کۆتایی رێککەوتنی نێوان هەولێر و بەغداد لەبەردەم حکومەتى هەرێمى کوردستاندایە ودەبێت هەرێم بە زووترین کات وەڵامی بەغدا بداتەوە.
سەرچاوەیەک لە ئەنجوومەنی وەزیرانی هەرێمی کوردستان، ئاشکرای کرد، رەشنووسی رێککەوتنێکی 10 خاڵی لەنێوان هەولێر و بەغداد لەبەردەم حکومەتی هەرێمی کوردستاندایە، بڕیارە تیمێک لە ئەنجوومەنی وەزیرانی هەرێمی کوردستان بۆ دوایین جار سەرنج و تێبینییەکانی خۆی لەبارەیەوەبدات و دواتریش رەوانەی بەغدادی بکەن.
سەرچاوەکە راشیگەیاند، پاش ئەوەى حکومەتی هەرێم سەرنجەکانى دەخاتەڕوو، رەشنووسەکە دەدرێتە دەست فوئاد حوسێن، وەزیرى دەرەوەى عێراق و پاشان رۆژى دووشەممە حەوتى تەمموز رادەستى محەمەد شیاع سودانی دەکات.
لە ئەگەری گەیشتن بە رێککەوتن لەبارەى رەشنووسەکەوە، بڕیارە سێشەممەی داهاتوو ئەنجوومەنی وەزیرانى عێراق، رێککەوتنەکە پەسەند بکات.
بەگوێرەی ڕەشنوسەكە، هەرێم 50% داهاتی ناوخۆ و 280 هەزار بەرمیل نەوت ڕادەستی بەغدا دەكات، هەروەها هەرێم 120 هەزار بەرمیل نەوتی پێدەدرێت بۆ بەكارهێنانی ناوخۆ و دانەوەی قەرزی كۆمپانیا بیانییەكان.
سەرچاوەیەكی ئاگاداریش لە بەغدا، ئەمڕۆ یەكشەممە بە میدیاكانی عێراقی ڕاگەیاندوە، ڕەشنوسی ڕێككەوتنی نێوان هەرێم و بەغدا لەلایەن هەریەكە لە د.فوئاد حسێن، وەزیری دەرەوە و حەیان عەبدولغەنی، وەزیری نەوتی عێراقەوە ئامادەكراوە و دانیشتنی داهاتوی ئەنجومەنی وەزیرانی عێراقدا دەخرێتە دەنگدانەوە.
بە پێی ئەو سەرچاوەیە، ئەگەر ئەنجومەنی وەزیرانی عێراق رێککەوتنەکە پەسەند بکات، موچەی فەرمانبەرانی هەرێم بە فەرمی خەرج دەکرێت.