بۆ سەربڕینی ئاژەڵ و قوربانیکردن بڕیاری نوێ دەدرێت
نهنایوز-هەواڵەکان
قائیمقامیەتی سلێمانی ڕایدەگەیەنێت، هاوشێوەی ساڵانی دیکە بە هەمووشێویەک لە کڕین و فرۆشتنی ئاژەڵ لە دەرەوەی مەیدانی ئاژەڵان ڕێگری دەکەن.
قائیمقامیەتی سلێمانی لە ڕاگەیەندراوێکدا ئاماژەی بەوەكردووە، وەک بەشێک لە رێکارەکانی خۆپارێزی و رێگریکردن لە توشبوون بە نەخۆشی تای خوێنبەربوون، قائیمقامی سلێمانی سەردانی مەیدانی ئاژەڵانی سلێمانی کرد و کاسبکارانی ناوچەکەیان ئاگادارکردەوە، کە لە چوارچێوەی رێنماییە تەندروستییەکان کارەکانیان ئەنجامبدەن.
ئاشکراشیکرد: لە ئێستادا کێشەی بڵاوبوونەوەی ڤایرۆسی تای خوێنبەربوون لە ئارادایە ئێمەش وەکو ئەرکی سەرشانی خۆمان پێشوەختە رێکارە تەندروستی و تەکنیکی و کارگێریەکانمان بە ئاراستەی کۆنترۆڵکردنی دۆخەکە توندتر کردوەتەوە.
باسی لەوەشکرد، تاوەکو بە هەماهەنگی لەگەڵ لایەنەپەیوەندیدارەکان بتوانین رێگری بکەین لە بڵاوبوونەوەی ڤایرۆسی تای خوێنبەربوون و هاووڵاتیان سەلامەت و پارێزراوبن.
ڕوونیشی كردۆتەوە، لە پێناو سەلامەتی هاووڵاتیان، کاسبکارانی ناوچەکەمان ئاگادارکردۆتەوە، لە کارکردنیاندا ڕەچاوی ڕێنماییە تەندروستی و ڤێتێرنێرییەکان بن و زیاتر پابەندی رێکارەکانی خۆپارێزیبن.
جەختی لەوەشکردەوە، لەوەی ئەمساڵیش هاوشێوەی ساڵانی پێشوتر قائیمقامیەتی سلێمانی ڕێگر دەبێت لە کڕین و فرۆشتنی ئاژەڵ لە دەرەوەی مەیدانی ئاژەڵ، سەربڕینی ئاژەڵ لە دەرەوەی کوشتارگەکان.
|