نها نیوز - هەواڵەکان
ئه‌ندامێكی فراكسیۆنی یه‌كێتی لە بەغدا رایگەیاند، له‌به‌غداوه قه‌ره‌بووی دوكانداره‌كانی داره‌سوتاوه‌كه دەکەنەوە.
د. نه‌رمین مه‌عروف، ئه‌ندامی پەرلەمانی عێراق لە فراکسیۆنی یەکێتی به ماڵپەڕی فەرمی یه‌كێتیی نیشتمانیی كوردستانی "بۆ زیانه ماددی و داراییه‌كان هه‌موو هه‌وڵێك ده‌ده‌ین تا حكومه‌تی فیدراڵ له بودجه‌ی یه‌ده‌گی له‌ناكاو قه‌ره‌بووی به‌شێك له‌و زیانانه بكاته‌وه".
وتیشی "بەپێی ماددەی شەش لە یاسای بودجەی گشتی عێراق دەتوانرێت بۆ هەر رووداوێکی نەخوازراو بڕی سێ ملیار دینار تەرخان بکرێت، کەلە یاساکەدا 150 ملیار دینار بۆ رووداوە نەخوازروەکان تەرخان کراوە، ئێمەش لە رێگەی ئەنجومەنی نوێنەرانەوە داوا دەکەین بەپێی ئەو ماددەیە قەرەبووی کاسبکارانی بازاڕی دارەسوتاوەکەی سلێمانی بکرێنەوە".
ئەوەش لەکاتێکدائە، به‌یانی ئه‌مڕۆ له‌ناو بازاڕی سلێمانی، به‌دیاریكراوی له بازاڕی داره‌سووتاوه‌كه ئاگر له‌چه‌ند دوكاتێك كه‌وته‌وه كه نزیكه‌ی 150 دوكان بوو، پاشان له‌لایه‌ن به‌رگری شارستانی سلێمانییه‌وه ئاگره‌كه كۆنترۆڵكراو ژماره‌یه‌ك دوكان زیانی ماددیان پێگه‌یشت، خۆشبه‌ختانه رووداوه‌كه زیانی گیانی پێوه‌نه‌بوو.
هاوكات ئاوات محه‌مه‌د، قائیمقامی سلێمانی ئاشکرایکرد، نزیکەی 150 دوکان زیانیان بەرکەوتووە، وەک ئیدارەی خۆجێی نوسراو ئاڕاستەی ئەنجومەنی وەزیران و لایەنە پەیوەندیدارەکان دەکەن بۆ هاوکاریکردنی ئەوانەی زیانیان بەرکەوتووە. راشیگەیاند "تائێستا هۆکاری ئاگرەکە نازانرێت، لەرێگەی لیژنەکەوە لێکۆڵینەوە لە رووداوەکە دەکرێت".