لێزمەباران دەبارێت

نهانیوز

شارەزایەکی بواری کەشناسی ئاشکرای کرد کە درەنگانی شەوی هەینی لەسەر شەممە، شەپۆلێکی زۆرباشی تاوەبارانی بەهێز و هەورەبرووسکە و تەرزە تەواوی هەرێمی کوردستان دەگرێتەوە و چەقی شەپۆلەکەش دەکەوێته ڕۆژی شەممە، سەرەتای بارانەکەش لە ناوچەکانی ڕۆژهەڵات و باشووری گەرمیانەوە دەستپێدەکات.

هەڤاڵ سەدیق گەڵۆزی، شارەزای بواری کەشناسی بڵاوی کردووەتەوە: بە گوێرەی نوێترین پێشبینییە سەرەتاییەکانی هەردوو سەنتەری کەشناسی ئەورووپی و ئەمریکی پێشبینی دەکرێت بەهۆی کاریگەری بەهێزی نزمەپەستانی دەریای سوور و هاتنی بڕێک شێ لە دەریای ناوەڕاستەوە شەپۆلێکی زۆر بە هێزی تاوەبارانی بەهاری و هەورەبرووسکەی بەهێز و تەرزە مامناوەند بۆ بارانی بەلێزمە سەرجەم ناوچه جیاوازەکانی هەرێمی کوردستان بگرێتەوە.

ئەوەشی خستووەتەڕوو" کاریگەری شەپۆلەکە بەپلە یەک لەسەر ناوچەکانی باشووری هەرێمی کوردستان (کەرکووک، گەرمیان، سلێمانی، هەڵەبجە و ئیدارەی ڕاپەڕین) هەیە، لە هەندێ لەو ناوچانە پێشبینی دەکرێت بڕی بارانبارین 20 بۆ 40 ملم تێپەڕ بکات، بەتایبەت ناوچەکانی گەرمیان، سلێمانی، هەڵەبجە و ڕۆژئاوا و باشووری هەولێر ئەگەری بارانبارینی زۆرباش هەیە بەبڕی جیاواز، شوێن بۆ شوێن دەگۆڕێت ڕووبار و بەنداوەکان دەبووژێنەوە و بڕێکی زۆر ئاو دەچێتەوە ناویان".

ئەو کەشناسە وتیشی" بەپلە دوو شەپۆلەکە کاریگەری لەسەر ناوچەکانی باکووری هەولێر. ناوچە شاخاوییەکانی هەولێر، ئیدارەی سۆران، پارێزگای دهۆک و ئیدارەی زاخۆ ئەگەری نمەباران بۆ بارانی مامناوەند هەیە".

باسی لەوەشکردووە: لە ناوچەکانی باشووری هەرێمی کوردستان هۆشداری لەدروستبوونی لافاو دەدەین لە هەندێ شوێن و ناوچە بەهۆی تاوەبارانی بەهێز و خێرا.

بەپێی ڕاپۆرتی ئەو کەشناسە کوردە، پلەکانی گەرما دوو – سێ پلەی سیلیزی دادەبەزێت و خێرایی با بەشێوەیەکی بەرچاو زیادەکات بەپێی کات و شوێن دەگۆڕێت لە هەندێ شوێن 50 کیلۆمەتر تێپەڕدەکات لەکاتژمێرێکدا.

جەختیشی لەوە کردووەتەوە کە کاریگەری شەپۆلەکە تا درەنگانی شەوی شەممە لەسەر یەکشەممە دەبێت و دواتر بەرەولاوازبوون دەچێت.