یەکێتی و پارتی هەنگاوێکی جدیتر بۆ پێکهێنانی حکومەت دەنێن
نها نیوز – هەواڵەکان
بەگوێرەی وتەی سەعدی پیرە وتەبێژی یەکێتی، دوای پشووی جەژن دەبارەی پێکهێنانی کابینەی نوێی حکومەت کۆدەبنەوە.
ئەمڕۆ چوارشەممە، سەعدی ئەحمەد پیرە، وتەبێژی یەکێتیی نیشتمانیی کوردستان دەربارەی کۆبوونەوەی داهاتووی حزبەکەی و پارتی رایگەیاند "بڕیارە دوای کۆتاییهاتنی پشووەکانی جەژنی رەمەزان وەفدی یەکێتی و پارتی دەربارەی پرسی پێکهێنانی کابینەی نوێی حکومەتی هەرێم کۆببنەوە".
وتیشی "تاوەکو ئێستا کاتی کۆبوونەوەی داهاتووی یەکێتی و پارتی دیارینەکراوە، بەڵام دوای کۆتاییهاتنی پشووی جەژنی رەمەزان کاتەکەی دیاریدەکرێت و کۆبوونەوەکە لەنێوان وەفدی هەردوولا ئەنجامدەدرێت".
پیرە ئاماژەی بەوەشکرد، ئەو کۆبوونەوانەی لەماوەکانی رابردوودا لەنێوان وەفدی هەردوو حزب ئەنجامدرابوون، توانیویانە بەشێکی زۆری کێشەکان چارەسەر بکەن.
|