نهانیوز-هەواڵەکان
لە رۆژی جیهانی ئۆتیزمە و سەرۆکی کۆمەڵەی ئۆتیزم لە هەرێمی کوردستان ئاشکرای دەکات کە لە هەرێمی کوردستان سێ هەزار و 900 منداڵی ئۆتیزم تۆمارکراون و لە هەر 90 منداڵی لەدایکبوو، یەکیان ئۆتیزمە.
رۆژی چوارشەممە 2ـی نیسانی 2025 کەمال جەباری، سەرۆکی کۆمەڵەی ئۆتیزم لە هەرێمی کوردستان لە کۆنفرانسێکی رۆژنامەوانیدا رایگەیاند؛ "ساڵی 2008 لە 150 منداڵی تازە لەدایکبوو لە هەرێمی کوردستان یەکیان ئۆتیزم بوو، بەڵام ئێستا رێژەکە زیادی کردووە و لە 90 منداڵی لەدایکبوو یەکیان ئۆتیزمە.
سەرۆکی کۆمەڵەی ئۆتیزم لە هەرێمی کوردستان هۆشداری دا؛ رەنگە دوای 20 ساڵی دیکە "لە 10 بۆ 15 منداڵی تازە لەدایکبوو، یەکیان ئۆتیزم بێت" و گوتیشی، "رەنگە هەر ماڵە و ئۆتیزمێکی هەبێت".
کەمال جەباری دەڵێت؛ "سێ هەزار و 900 ئۆتیزم لە هەرێمی کوردستان تۆمارکراون کە لەو ژمارە تەنیا 12٪ـیان لە سەنتەرەکانی ئۆتیزمی حکومەتی هەرێمی کوردستان سودمەندن و 40٪ـی خێزانی ئۆتیزم بەدەست هەژارییەوە دەناڵێنن"، دەشڵێت، "تاوەکوو ئیستا 50 خێزان بەهۆی منداڵی ئۆتیزمەوە هەڵوەشاونەتەوە، هەروەها 80%ـی دایک و باوکانی منداڵانی ئۆتیزم تووشی گرفتی دەروونی بوون".
سەرۆکی کۆمەڵەی ئۆتیزم لە کوردستان دووپاتی کردەوە؛ "11%ی منداڵانی تووشبووی ئۆتیزم لە لایەن حکوومەتەوە مووچەیان پێدەدرێت، کە ژمارەیان 394 منداڵە. بۆ بڕینەوەی مووچەی سەرجەم منداڵانی ئۆتیزم، حکوومەتی هەرێمی کوردستان لیستی ناوەکانی ڕەوانەی بەغدا کردووە، بەڵام بەغدا تاوەکوو ئێستا کارەکانی تەواو نەکردووە".
بەگوێرەی ئاماری کۆمەڵەی ئۆتیزمی کوردستان لە هەولێر 14 سەنتەری ئۆتیزم، سلێمانی 8 سەنتەر، دهۆک 7 سەنتەر و گەرمیان 4 سەنتەری ئۆتیزم هەن.
هەر بەپێی ئاماری کۆمەڵەکە، لە کۆی سێ هەزار و 900 ئۆتیزم، هەزار و 350ـیان لە پارێزگای هەولێرن کە 80٪ـیان کوڕ و 20٪ـیان کچن. 950 منداڵی ئۆتیزم لە هەڵەبجە و سلێمانین کە 79٪ـیان کوڕ و 21٪ـیان کچن. لە دهۆکیش 900 منداڵی ئۆتیزم هەن کە 77٪ـیان کوڕ و 23٪ـیان کچن.
لە ئیدارەی سەربەخۆی زاخۆش 350 منداڵی ئۆتیزم هەن کە %76ـیان کوڕن و 24٪ـیان کچن، لە ئیدارەی سەربەخۆی گەرمیان 350 منداڵی ئۆتیزم هەن کە لەو رێژەیە 80٪ـیان کوڕ و 20٪ـیان کچن.