شەپۆلێکی بەهێزی بارانبارین بەڕێوەیە و پێشبینی لافاو دەکرێت
نهنایوز-هەواڵەکان
کەشناسێکی کورد زانیاری لەسەر هاتنی دوو شەپۆلی نوێی بارانبارین و هەورە بروسکە ئاشکرا دەکات و ڕایدەگەیەنێت، لە سەرەتای هەفتەی داهاتوو کەشێکی بەهاری ناوچەکە دەگرێتەوە و باران دەبارێت.
ئاراس جەبار، شارەزای کەشناسی ڕاگەیاند: سبەینێ چوارشەممە، لە کاتەکانی نیوەرۆوە ھەورە بروسکە و تاوە باران لەناوچەکانمان دەستپێدەکاتەوە بەتایبەت لەسەر ناوچە شاخاوییەکانی پارێزگای دھۆک و ھەولێر و ئیدارەی سۆران چالاکتر دەبێت و ھەندێک کات بارانی بەخوڕ دەبارێت و پاشان بەکاریگەری لاواز درێژ دەبێتەوە بۆ سەر ناوچەکانی پارێزگای سلێمانی و ھەڵەبجە و ئیدارەی راپەرین بەشێوەی نمە باران و لەھەندێ شوێنیش تاوە بارانی مامناوەند دەبارێت و ئێوارە کۆتایی پێدێت.
ئەوەشی وت: “پلەکانی گەرما بە جێگیری دەمێنێتەوە تەنھا لە ناوچە شاخاوییەکان بەراورد بە ئەمڕۆ دوو تا سێ پلە نزمدەبێتەوە، بای باشووری رۆژھەڵات کاتەکانی نێوان نیوەرۆی سبەی بۆ ئێوارە چالاک دەبێت بە خێرایی 15 تا سەرووی 40 کیلۆمەتر لە کاتژمێرێکدا و ئەگەری بەرزبوونەوەی تۆز و خۆڵ دەبێت.
ئاراس جەبار، ئەوەشی خستەڕوو: رۆژانی پێنجشەمە و ھەینی کەش سەقامگیر دەبێت، لە بەرەبەیانی رۆژی شەممەوە ناوچەکانی پارێزگای سلێمانی و ھەڵەبجە و ئیدارەی راپەرین و گەرمیان دەکەوێتە بەرکاریگەری تەوژمە ھەوایەکی تەر و شێدار کە لە دەریای سوور و کەنداوی عەرەبیەوە درێژ دەبێتەوە و پێشبینی دەکرێت بەدرێژای کاتەکانی رۆژی شەممە تا بەرەبەیانی رۆژی یەکشەممە ھەورە بروسکەی بەھێز و تەرزە و لێزمە باران لەو ناوچانەدا چالاک ببێت لەگەڵ ئەگەری بەرزبوونەوەی ئاستی ئاو و دروستبوونی لافاویش لەھەندێ کات و شوێندا.
وتیشی: “ناوچەکانی دیکەی ھەرێمی کوردستانیش بەرێژەیەکی لاوازتر دەگرێتەوە”.
|