هۆڵی پەرلەمانی کوردستان ئامادەکرا و مەترسی ئاشکراکرا

نها نیوز - هەواڵەکان

كەمتر لە 48 كاتژمێر ماوە و هێشتا پەرلەمانتاران بانگهێشتی فەرمی نەكراون، لایخۆشیەوە دیوانی سەرۆکایەتی پەرلەمانی کوردستان دەڵێت، هۆڵی پەرلەمان ئامادەیە بۆ دانیشتنی چوارشەممە.

هیوا نەسرەدین، جێگری سەرۆكی دیوانی سەرۆكایەتی پەرلەمانی كوردستان بە میدیاکانی وت "هۆڵی كۆبوونەوەكانی پەرلەمان ئامادەیە بۆ دانیشتن و ئەوەی كۆبوونەوە پێكدەهێنێت ئامادەبوونی پەرلەمانتاران و تەواوبوونی نیسابی دانیشتنەكەیە، ئێمە رێگر نیین و رێگریشمان نەكردووە و ئامادەكاریمان كردووە و هۆڵەكە كراوە و ئامادەیە".

وتیشی "بۆ كۆبوونەوەكەی رۆژی چوارشەممە هۆڵی دانیشتنكراوەیە".

دوێنێ محەمەد سلێمان سەرۆكی تەمەنی پەرلەمان نوسراوێكی ئاراستەی دیوانی پەرلەمانی كوردستان كردووە بۆ ئەوەی بانگهێشتی پەرلەمانتاران بكرێت بۆ كۆبوونەوەیەك كە دەستەی سەرۆكایەتی پەرلەمان هەڵبژێردرێت، بەڵام ماوەی كەمتر لە 48 کاتژمێری ماوە بۆ كاتی دانیشتنەكە، تائێستا بانگهێشتی دانیشتنی پەرلەمان نەكراوە.

هاوکات، بەپێی پەیڕەوی ناوخۆی پەرلەمان دەبێت 48 كاتژمێر بەر لە دانیشتن، بە فەرمی ئەندامانی پەرلەمان ئاگاداربكرێنەوە لە دانیشتنی پەرلەمان و بانگهێشتەكە بڵاوبكرێتەوە و لە سایتی فەرمی پەرلەمان دابنرێت، بەڵام تائێستا نوسراوی فەرمی لەلایەن سەرۆكایەتی دیوانی پەرلەمانەوە دانیشتنەكە نەكراوە و لە سایتی فەرمی دانەنراوە و بانگهێشتی فەرمی ئەندامان نەكراوە، پەرلەمانتاران دەڵێن؛ نوسراوەكەی سەرۆكی تەمەنی پەرلەمان بۆ سەرۆكایەتی دیوانی پەرلەمانە و بەفەرمی بانگهێشتی پەرلەمانتاران نەكراوە.

جگە لەوەش، هەندێك دەڵێن؛ ئەم نوسراوە بانگهێشتنامەی فەرمی نییە و بانگهێشتی فەرمی نییە و وادەش بەسەرچووە، چونكە كەمتر لە 48 كاتژمێر ماوە بۆ وادەی دانیشتنەكەی چوارشەممە و بەفەرمی بانگهێشتنامە لە سایتی فەرمی پەرلەمان بڵاونەكراوەتەوە، بەپێی ئەم بۆچوونەش بێت دانیشتنی رۆژی چوارشەممە لەرووی یاساییەوە بەدی نایات.

لەبەرامبەردا بۆچونێكی تر پێیوایە نوسراوەكەی سەرۆكی تەمەنی پەرلەمان بە بانگهێشت هەژمار دەكرێت و پێویستی بەوە نییە سەرۆكی دیوان بانگهێشت نامە ئاراستەی پەرلەمانتاران بكاتەوە بەو پێییەی دانیشتنی یەكەمی پەرلەمان بە كراوەی ماوەتەوە و ئەمە درێژكراوەی دانشتنی رۆژی 2ی كانوونی یەكەمی 2024ەو لە دەسەڵاتی سەرۆكی دیوان نییە بانگهێشتی پەرلەمانتاران بكات، نوسراوەكەی سەرۆكی تەمەن بانگهێشتە.