نها نیوز - هەواڵەکان
بەپێی وتەی هۆگر چەتۆ سەرۆکی تۆڕی شەمس، سبەینێ ئەنجومەنی کۆمسیاران لەسەر راپۆرتی تەواوکاری لیژنەی سکاڵاکانی لە هەولێر کۆدەبێتەوە و بۆ رۆژی چوارشەممە ئەنجامی کۆتایی هەڵبژاردن رادەگەیەنێت، ناوبراو زانیاریەکیش ئاشکرادەکات و دەڵێت "بەدڵنیاییەوە گۆڕانکاریش لە کاندیدەکاندا روودەدات".
هۆگر چەتۆ، سهرۆكی تۆڕی شهمس بۆ چاودێریی ههڵبژاردنهكان لە هەرێمی کوردستان لە لێدوانێکی تایبەتدا وادەی راگەیاندنی ئەنجامی کۆتایی هەڵبژاردنی خولی شەشەمی پەرلەمانی کوردستان ئاشکرا دەکات و بۆ نها نیوز دەڵێت "کۆمسیۆن هەموو ئەو کارانەی پێویست بوبێت تەواویکردووە، لەوانە ئەو 26 وێستگەیەی نەنێردرابوون تەواویکردوون، هەروەها 189 سکاڵای هەبوو لیژنەی سکاڵاکان راپۆرتی خۆی تەواوکردووە و بەرزیکردووەتەوە بۆ ئەنجومەنی کۆمسیاران، بڕیارە ئەنجومەنەکە سبەینێ کۆببێتەوە لە هەولێر و سەیری ئەو راپۆرتەیە بکەن دواتر بڕیاردەدەن لەسەر دەرئەنجامەکان، وە راگەیاندنیشی دەکەوێتە دوو سبەی واتە چوارسەممە، چونکە ئەو دەرئەنجامە سەد لەسەدی دەرئەنجامەکانە و رێژەی تێدا نییە". نابراو جەختیشیکردەوە "پێشبینیکراوە رۆژی چوارشەممە دەرەنجامی کۆتایی رابگەیەندرێت".
وتیشی "دوای راگەیاندنەکە ئەو لایەنانەی رەزامەند نەبوون بە دەرەنجامەکان سێ رۆژ ماوەیان لەبەردەست دەبێت تانە لەئەنجامەکان بدەن".
لەبارەی ئەوەی ئایا ئەگەر هەیە گۆڕانکاری لە براوەی کاندیدەکان روبدات؟ هۆگر چەتۆ ئەوەش بۆ نها ئاشکرا دەکات "ئەم پرسیارە دوو بەشە بەشی یەکەمیان کورسیەکانە کە بەپێی سکاڵاکانە، چونکە ئێمە هیچ سندقێکمان نەبوو سور بێت واتە رەتکراوە، دووەم بەپێی 26 وێستگەکە کە دابەشبوون بەسەر سێ بازنەکەدا ژمارەی دەنگدانی لایەنەکان ئەگەر هەیە لە سلێمانی 200 بۆ 300 دەنگێک رکابەری هەبێت کە کێ باقی ئەقوا دەبات، بەڵام بەپێی زانیارییەکانی من هیچ گۆڕانکارییەک لەوەدا روونادات کە راگەیەندرا، دواجار راگەیاندنی کۆمسیۆن فەرمییە".
هەر لەوبارەیەوە سەرۆکی رەوتی شەمس زیاتر روندەکاتەوە و رایدەگەیەنێت "بەنسبەت کاندیدەوە بەدڵنیاییەوە جیاوازە، چونکە زۆرجار لەزیادکردنی ئەو 26 وێستگەیە کاندید بۆ کاندید 27-30 دەنگ جیاوازییان هەیە، هەربۆیە ئەو ئەگەرە واریدە ناوی کاندیدەکان گۆڕانکاری بەسەردا بێت لە ئەنجامی کۆتایی، وە پاشان ناوی کاندیدی براوەکان لە سایت ئاشکرا دەکرێت".