حکومەتی کاربەڕێکەر بڕیارە دڵخۆشکەرەکەی راگەیاند و قۆناغی یەکەم دەستپێکرد
نها نیوز - هەواڵەکان
ئەمڕۆ وەزارەتی شارەوانی قۆناغی یەكەمی دابەشكردنی زەوی لە سلێمانی، هەولێر، گەرمیان و زاخۆ دەستیپێكرد.
وەزارەتی شارەوانی و گەشتوگوزاری حکومەتی کاربەڕێکەری هەرێمی کوردستان لەمیانی لە ڕاگەیەندراوێکدا ئاماژەی بەوەدا "ئەمڕۆ پێنج هەزار پارچە زەوی لە سنوری سەرۆكایەتیی شارەوانیی هەولێر رادەگەیەنین، جگە لەوەش، دوو هەزار و 300 پارچە زەوی دیكەش بەسەر خانەوادەی شەهیدان و زیندانییانی سیاسی دابەشدەكرێت كە پێشتر فەرمانی وەرگرتنی زەویان هەبووە و ئێستا رێكارەكانی تەواو بوون، واتە حەوت هەزار و 300 پارچە زەوی دابەشدەكرێت.
هەر بەپێی راگەیەندراوەکە، هەر ئەمڕۆ لە سەرۆكایەتیی شارەوانیی سلێمانی شەش هەزار و 577 پارچە زەوی وەك قۆناغی یەكەم دابەشدەكرێت، لە سنووری ئیدارەی سەربەخۆی گەرمیان بۆ قۆناغی یەكەم رەزامەندی لەسەر دوو هەزار و 474 پارچە زەوی دراوە و دوێنێش هەزار و 241 پارچە زەوی لە زاخۆ راگەیەندرا.
وەزارەتی شارەوانی ئەوەشی خستووەتە روو "لە رۆژانی داهاتوودا قۆناغەكانی دیكەی پرۆسەكە رادەگەیەنین، لە هەموو شارەوانییەكانیش نەخشەی پێویست بەپێی ژمارەی فەرمانبەران ئامادەكراوە.
|