نها نیوز - راپۆرت
لە ڕاپۆرتێکدا ئاشکراکراوە، بڕیاری لەناکاوی ئەمریکا بۆ کشاندنەوەی هێزەکانی لە بنکەکانی عەین ئەسەد و ڤیکتۆریا و گواستنەوەیان بۆ هەولێر و چەند وڵاتێکی عەرەبی؛ نیشاندەری گۆڕانی سەربازیی واشنتۆنە لە ڕۆژهەڵاتی ناوەڕاست، هەروەها کەمکرنەوەی گوشاریشە لەناوخۆی بەغدا. هاوکات شارەزایەکی بواری سەربازیش بە نها دەڵێت "هاتنی هێزەکانی ئەمریکا بۆ هەولێر مەترسی زۆری نابێت ئەگەریش هەبێت لە پاشەڕۆژدا بە قازانج دەگەڕێتەوە".
ئاژانسی هەواڵی مێهر بەپشتبەست بە راپۆرتێکی ژێئۆپۆلێتیکاڵ مانتیۆر بڵاویکردووەتەوە، بڕیاری لەناکاوی ئەمریکا بۆ کشاندنەوەی هێزەکانی لە بنکەکانی عەین ئەسەد و ڤیکتۆریا و گواستنەوەیان بۆ هەولێر و چەند وڵاتێکی عەرەبیی دراوسێ، نیشاندەری گۆڕانێکی گرنگی هەیکەلی سەربازیی واشنتۆنە لە ڕۆژهەڵاتی ناوەڕاست. هەرچەندە بەڕواڵەت بە کشانەوە دەچێت، بەڵام لەڕاستیدا هەنگاوێکە بۆ داڕشتنەوەی پلانێکی تۆکمە و تیایدا ئامانجی هاوسەنگی ئەمنییە بۆ پاراستنی پێگەی ستراتیژی و مەترسییەکانی خۆی لەلایەن سیاسەتی ناوخۆیی عێراق و ململانێی ناوچەییەکان.
سەبارەت بە ئامانجەکانیش لە راپۆرتەکەدا باس لەوەکراوە، ئەمریکا بۆ پاراستنی پێگەی خۆیەتی لە عێراق و کەمکردنەوەی فشاری ئەمنییشە لەبەغدا. چونکە بنکەکانی عەین ئەسەد لە ئەنبار و ڤیکتۆریا لە بەغدا زۆرجار لەلایەن هێزە ملیشیاکانەوە کراونەتە ئامانجی هێرشی مووشەکی و درۆنی. هەربۆیە کشانەوەی ئەمریکا لەو بنکانە، پاراستنی گیانی هێزەکانیان و زیانی مادی و سیاسییە لە وڵاتەکە.
دەربارەی هاتنی هێزەکانی ئەمریکا لە بەغداوە بۆ هەولێر، مانتیۆر دەڵێت "محەمەد شیاع سودانی سەرۆک وەزیرانی عێراق لەژێر گوشاری پەرلەمان و ڕەوتە سیاسییەکانە بۆ کۆتاییهێنان بە سەربازانی بیانی (هێزە هاوپەیمانییەکان) لە خاکی وڵاتەکەیدا، بەوەیش بەکشانەوەیان لە بنکەکان هەندێک لەباری ئەو گوشارانە کەمدەکاتەوە و هاوکات هاتنی ئەمریکا بۆ هەولێر، نەک کێشە دروستناکات، بەڵکو بۆ هەرێم شەرعییەتێکی زیاتری بەدواوەیە.
لایخۆشیەوە، لیوا محەمەد سابیر هەمەوەندی، شارەزای بواری سەربازی لەبارەی کشانەوەی هێزە هاوپەیمانییەکان لە عێراق بە نها نیوزی وت "راستە هاوپەیمانانی ئەمریکا لە عێراق دەکشێنەوە، چونکە دۆخی ئێستا زۆر ئاڵۆزە و لەلایەکی دیکەشەوە ئێران و ئەمریکا نەگەیشتوونەتە رێککەوتن".
وتیشی "لاریجانیش کە هاتە عێراق و هاوپەیمانییەکی دروستکرد لەگەڵ سودانی، ئەوەش بەو واتایە دێت هەر کێشەیەک لە عێراق بێت لە ئێرانە وە بەپێچەوانەوە، ئەوەش دۆخێکی ترسناکە بۆ هێزەکانی ئەمریکا. هەروەها ئەمریکاش لەبەر بەرفراوانی هێزی حەشدی شەعبی ناتوانێت چەکیان پێ دانێت و تا بێت بەهێزتریش دەبن، هێزەکانی دەکشێنێتەوە".
ئەو خاڵیکی گرنگ ئاشکرا دەکات و دەڵێت "من پێمواییە رووبەڕووبوونەوەی ئەمریکا و ئێران نزیکە، هەر ئەوەیش وایکردووە بەناچاری ئەمریکا هێزەکانی بکشێنێتەوە بۆ کوردستان".
بەپێی راپۆرتەکەی ژێئۆپۆلێتیکاڵ مانتیۆر لەبارەی هۆکاری مانەوەی هێزەکانی ئەمریکا لە هەولێر، بۆ ئەم خاڵانە دەگەڕێتەوە:
1. ناوچەی هەولێر هەلی ئەوە بۆ ئەمریکا دەڕەخسێنێت تا چالاکییەکانی عێراق و سوریای لەژێر چاودێریدا بێت.
2. هەرێم و پێشمەرگەکانی هاوپەیمانانێکی جێ متمانەی واشنتۆنن.
3. هێرش بۆسەر ئەمریکیەکان لە عێراق بۆ هێزە میلیشیاکان دژوار و لەرووی مادییەوە تێچووی زۆرە.
پەیوەست بەوەی هاتنی هێزەکانی ئەمریکا بۆ هەلێر چ پەیوەندیەکی بە تورکیاوە هەیە، بەوتەی مانتیۆر "مانەوەی ئەمریکا لە هەولێر، بەرگری لە ئۆپەراسیۆنەکانی تورکیا دەکات لە عێراق. بەڵام ئامادەبوونی سەربازیی ئەمریکا، لێکدانەوەکانی ئەنقەرە ئاڵۆزتر دەکات؛ چونکە واشنتۆن پێوایە ئەم ناوچانە بەشێکن لە پاراستنی ئەمنیی ئەو".
هاوکات محەمەد هەوەندی بە ئاشکرا بێ توانایی ئەمریکا لە مەڕ حەشدی شەعبی دەخاتە روو و، ئاماژە بەوە دەکات "ئەمریکا لەئیستادا ئەو هێزەی نییە لە عێراق ئیدارە بکات، بەتەنیا فڕۆکە شک دەبات و لەهێزی زەمینی لاوازە، بەوەیش ناچارە هێزەکانی بکشێنێتەوە بەرەو کوردستان، چونکە ناوچەی هەولێر زۆر ئەمانە بۆ هێزی ئەمریکا هەروەها دووریشە لە ئێران".
ئەو شارەزا سەربازییە راشیگەیاند "ئەگەر هێزەکانی هاوپەیمانان بێنە هەولێر و کێشەیان بۆ دروستبکرێت لەلایەن میلیشیاکانی ئێران و حەشدی شەعبی و عێراقەوە دەبێت، واتە ئەگەر هێزەکان بکەونە شەڕەوە؛ ئەمریکا دوژمنەکانی خۆی دەناسێت، نەک هەرێم تاوانبار بکات".
پەیوەست بە مەترسی کوردستانیش، شارەزا سەربازیەکە هێمای بۆ ئەوەکرد، کە حکومەتی کوردستان هیچ مەجالێک نادات هیچ هێزێکی لاوەکی و دەرەکی هێرشبکاتە سەر هەرێم.
سەبارەت بە مەترسی بوونی هێزە ئەمریکییەکان لە هەولێر، محەمەد سابر هەمەوەندی وتی "مەترسیەکە زۆر نییە، ئەگەریش مەترسیش بۆ هەرێم هەبێت و زیانی بەربکەوێت، لە پاشەڕۆژدا بە قازانج دەگەڕێتەوە بۆ کوردستان لەلایەن ئەمریکاوە".
لەلایەکی دیکەشەوە لەکۆتایی راپۆرتەکەدا باس لەوەکراوە، بەگشتی شوێنگۆڕکێی ئەمریکا نیشاندەری نەک نایەوێ لە عێراق بکشێتەوە، بەڵکو بە گۆڕینی شوێنێ جێگربوونی هێزەکانی، بەدوای پاراستنی پێگە، کەمکردنەوەی تێچووە سیاسی و ئەمنییەکان و بەرزکردنەوەی ئاستی لێکدانەوەی لەبەرامبەر هەڕەشە ناوچەییەکانە.
ئەوەش خراوەتە روو، لەدوای ئەوەی ئەمریکا فشارەکانی بۆسەر هەڵوەشاندنەوەی هێزە میلیشیاکانی عێراق بەتایبەت حەشدی شەعبی راگەیاند و فیدراڵ پابەند نەبوو! بەهۆیەوە هێزە هاوپەیمانییەکان روو دەکەنە هەرێمی کوردستان بەتایبەت شاری هەولێر.
ئامادەکردنی/ نها نیوز