شاندێکی هەرێم بۆ پرسی مووچە سەردانی بەغدا دەکات
نهانیوز-هەواڵەکان
بڕیارە شاندێکی هەرێمی کوردستان سەردانی بەغدا بکات، سەرچاوەیەکیش لە وەزارەتی دارایی و ئابووریی هەرێم دەڵێت"بۆ گفتوگۆکردن و ڕوونکردنەوە لەسەر داهاتە نانەوتییەکان دەچن".
ئەمڕۆ یەکشەممە 31ی ئاب میدیای یەکێتی، لە زاری سەرچاوەیەکی باڵای وەزارەتی دارایی و ئابووریی هەرێم بڵاویکردەوە" ئەم هەفتەیە شاندێک سەردانی بەغداد دەکات، کە پێکهاتوون لە نوێنەری ئەنجوومەنی وەزیران، وەزارەتەکانی دارایی و ئابووری، شارەوانی و گەشتوگوزار، کارەبا لەگەڵ نوێنەری چاودێریی دارایی و بەڕێوەبەری باج".
سەرچاوەکەی وەزارەتی دارایی و ئابووری وتیشی، “پێشتر شاندێکی باڵای هەرێمی کوردستان سەردانی بەغدای کرد و لەگەڵ وەزارەتی دارایی عێراق باسی داهاتی نانەوتیان کردبوو، بەڵام ڕێککەوتن لەسەر کۆمەڵێک وردەکاری ماوە”.
بەپێی زانیارییەکان، شاندەکەی هەرێمی کوردستان لەگەڵ شاندێک لە وەزارەتی دارایی عێراق کۆ دەبنەوە تا ڕوونکردنەوەیان لەبارەی داهاتە نانەوتییەکان پێبدەن کە چۆنە و چەندە، کە پێدەچێت دانیشتن و کۆبوونەوەی دیکەش لەمبارەیەوە بەردەوام بێت.
|