شاندی تەکنیکی هەرێم بۆ پرسی مووچەی مانگی دوو دەچنەوە بەغدا

نها نیوز – هەواڵەکان

بڕیارە ئەمڕۆ دووشەممە، 10ـی شوباتی، 2025، شاندی تەکنیکی دارایی هەرێم سەردانی بەغدا بکاتەوە بۆ تەواوکردنی رێککەوتنی نێوان هەولێر و بەغدا لەسەر بودجەی ساڵی 2025. 

بەپێی زانیارییەکان، ئەمڕۆ شاندێکی تەکنیکی لە وەزارەتی دارایی و ئابووری هەرێم  سەردانی بەغدا دەکەنەوە، بەمەبەستی تەواوکردنی هەموو ڕێکارەکانی ڕێککەوتنی نێوان هەرێم و عێراق کە پێشتر گفتوگۆی لەسەر کراوە بۆ بودجەی ساڵی 2025.

بڕیارە هەفتەی داهاتووش شاندێکی دیکەی وەزارەتی دارایی بچنەوە بەغدا بەمەبەستی تەواوکردنی ڕێکارەکانی ڕێککەوتنی نێوان هەولێر و بەغدا لەسەر مووچە، میلاکات، و هاوتاکردن و بایۆمەتری و بەبانکیکردنی موچەی فەرمانبەران  بۆ ساڵی 2025.

ئەوەشخراوەتەڕوو، شاندەکە لەگەڵ خۆیدا لیستی مووچەی مانگی دوو دەبەن، بەشێوەی مانگی پێشوو کە بە سیستەمی "پایارۆڵ" نێردرا بۆ بەغدا.