عێراق مووچە بۆ سەربازە بریندارەکان دابیندەکات و هەرێمیش دەگرێتەوە

نها نیوز – هەواڵەکان

حکومەتی عێراق 150 بۆ 250 هەزار دینار وەکو مووچەى چاودێریکارى بریندارانى سوپاى دابین دەکات، لەوبارەیەوە پەرلەمانتارێکی کورد لە بەغدا دەڵێت: دابینکردنی بڕی ئەم مووچەیەش سەربازە بریندارەکانی هەرێمی کوردستان دەگرێتەوە.

سەگڤان سندى، جێگرى سەرۆکى لیژنەى ئاسایش ‌و بەرگریى له ‌پەرلەمانى عێراق ئاشکرایکرد "حکومەتی عێراق پێشکەشکردنى داواکاریى مووچەى چاودێریکارى بریندارانى سوپاى دەستپێکرد کە لەنێوان 150 بۆ 250 هەزار دینار دەبێت، دابینکردنی بڕی ئەو مووچەیە تەنیا کەسوکارى ئەو سەربازە بریندارانەى سوپاى ئێستا و پێشووى عێراق دەگرێتەوە کە خەڵکى هەرێمى کوردستانن‌ و برینداربون‌، بەهۆیەوە تواناى کارکردنیان نەماوە".

سندی راشیگەیاند "مووچەکە ئەوکەسانە دەگرێتەوە کە کەسی پلەیەکى بریندارن، بڕى مووچەکە لەنێوان 150 بۆ 250 هەزار دینار دەبێت، دایک‌ و باوک‌ و هاوسەر، کوڕ و کچ، خوشک‌ و براو باپیر و داپیرە و نەوەکانى بریندارەکە دەتوانن ئەو داواکارییە پێشکەشبکەن، بەو مەرجەى کەسی بریندار ڕێژەى کەمئەندامییەکەى 75% بێت".