نها نیوز – هەواڵەکان
سوپای پاسدارانی ئێران ئاشکرایکردووە، ئەوان دەست پێشخەری ناکەن بۆ شەڕ، بەڵام دەڵێت، "بۆ هەموو شەڕێک ئامادەین و فێربووین چۆن دوژمن تێکبشکێنین و یەک هەنگاو پاشەکشە ناکەین".
ئاژانسی ئێرنا بڵاوی کردووەتەوە، حسێن سەلامی، فەرماندەی گشتیی سوپای پاسداران ڕایگەیاندووە، ساڵی ڕابردوو (ئێرانی) (کۆتایی هات لە 20ـی ئازار) ساڵێکی پڕ تەحەدای و ئەوپەڕی سەخت بووە، کە تێیدا "هەموو هێزەکانی کوفر لە دژی بەرەی ئیسلام ڕیزیان گرت و هەموو وزە ئەگەرییەکانی خۆیان لە گۆڕەپانی ڕووبەڕووبوونەوەدا کۆکردەوە".
سەلامی لە درێژەی قسەکانیدا سەبارەت بە گیانلەدەستدانی چەند فەرماندەیەکی سوپای پاسداران لەوان مەیجر زاهیدی، مەیجر جەنەراڵ حاج ڕەحیمی و هاوکارەکانیان لە هێرشی سەر کونسوڵخانەی ئێران لە دیمەشق وتی: "دوابەدوای ئەم ڕووداوە لە پرۆسەی بڕیاردان و خۆئامادەکردندا بووین بۆ شەڕێکی ڕاستەوخۆ لەگەڵ دوژمنێک کە دەستڕاگەیشتنێکی جیهانی هەبێت".
دەشڵێت: "هیچ ترسێکمان نییه و بەهیچ شێوەیەک لەشەر ناترسین، بەڵام یەکەم کەس نابین بۆ هەڵگریسانی شەڕ، بەڵام بەتەواوی ئامادەکاریمان کردووە بۆ هەر ئەگەرێکی جەنگ".
ئاماژەی بەوەشکردووە، ئەوان بەتەواوی ئامادەکارییان کردووە بۆ ڕووبەڕووبونەوەی هەرشەڕێکی دەرونی و سەربازی کە لەلایەن دوژمنەوە دەستپێبکات".
بە وتەی سەلامی، ئێران "توانای گەیشتن بە دوژمنەکەی" هەیە، ڕوونی دەکاتەوە: "دەسەڵاتێکی گەورەیان کەڵەکە کردووە، ئەگەر دوژمنیش بیەوێت بە لابردنی کۆت و بەندەکان لە دەستمان، ڕاستییەکانی هێزی ئێمە ببینێت، ئەوا ئەوان بە تەواوی ئامادەکاریان کردووە.
پێشتریش مەسعوود پزیشکیان سەرۆک کۆماری ئێران ڕایگەیاندبوو، وڵاتەکەی دەیەوێت لە ئاستێکی یەکساندا لەگەڵ ئەمەریکا گفتوگۆ بکات، نەک لەلایەکەوە هەڕەشەی لێ بکرێت و لەلایەکی دیکەوە داوای دانوستان بکرێت.
ئەوەش لە کاتێکدایە دۆناڵد ترەمپ، سەرۆکی ئەمریکا پێشتر هەڕەشەی لە ئێران کردبوو، ئەگەر نەتوانێت لەگەڵ واشنتۆن سەبارەت بە بەرنامە ئەتۆمیەکەی بگەنە ڕێککەوتن لەگەڵ واشنتۆن، بە لێدانی "بێ وێنە" و باجی لاوەکی دەخرێتە سەر.