نه‌ته‌وه یه‌كگرتوه‌كان هۆشداری له كاریگه‌ری باجه‌كانی تره‌مپ ده‌دات
نهانیوز-هەواڵەکان
وتەبێژی سکرتێری گشتی نەتەوە یەکگرتووەکان، هۆشداریدا لەوەی کەس لە شەڕی بازرگانیدا سەرناکەوێت، دوای ئەوەی ئیدارەی ئەمریکا باجی بەسەر وڵاتانی جیهاندا سەپاند.
ئەمڕۆ شەممە، ستیفان دوجاریک، وتەبێژی سکرتێری گشتی نەتەوە یەکگرتووەکان، لە وەڵامی پرسیارێکدا سەبارەت بە لێدوانەکانی گۆتێرێس، سەبارەت بە سیاسەتی گومرگی ئەم دواییەی کۆشکی سپی، وتی، لە شەڕی بازرگانیدا کەس سەرناکەوێت.
ئاماژەی بەوەشکرد، خەمی ئێستامان بۆ ئەو وڵاتانەیە کە زۆرترین زیانیان بەرکەوتووە، ئەو وڵاتانەی کەمترین ئامادەکارییان هەیە بۆ مامەڵەکردن لەگەڵ بارودۆخی ئێستا.
ئەوەشی خستەڕوو، ئامانجەکانی گەشەپێدانی بەردەوامی نەتەوە یەکگرتووەکان کاریگەریی نەرێنی لەسەر دەبێت بەهۆی سەرهەڵدانی شەڕی بازرگانی جیهانی.
هەروەها، کۆنفرانسی بازرگانی و گەشەپێدانی نەتەوە یەکگرتووەکان (UNCTAD) رۆژی هەینی لە بەیاننامەیەکدا هۆشداریی دا کە ئەو باجانەی ئەمریکا دەیسەپێنن زیان بە وڵاتانی لاواز دەگەیەنن.
وتیشی: “سیستەمی بازرگانی جیهانی دەچێتە قۆناغێکی گرنگەوە کە هەڕەشە لە گەشەکردن و وەبەرهێنان و پێشکەوتنی گەشەپێدان دەکات، بەتایبەتی لە ئابوورییە لاوازەکاندا، لەکاتێکدا ئابوورییە گەورەکان خۆیان بۆ سەپاندنی باجی نوێی هەمەلایەنە ئامادە دەکەن”.
ئەوەش لە کاتێکدایە، دۆناڵد ترەمپ، سەرۆکی ئەمریکا چوارشەممەی رابردوو سەپاندنی باجی بنەڕەتی ٪10ـی بەسەر زۆربەی وڵاتانی جیهان راگەیاند.
|