نها نیوز – هەواڵەکان
نووسینگەی ناوەندی ئاماری فەلەستین ئاشکرایکردووە، نزیکەی 39 هەزار منداڵ دوای 534 ڕۆژ شەڕ لە کەرتی غەززە یەکێک یان دایک و باوکیان لەدەستداوە.
ڕۆژی پێنجشەممە، نووسینگەی ناوەندی ئاماری فەلەستین لە بەیاننامەیەکدا بۆ یادی ڕۆژی منداڵانی فەلەستین کە دەکەوێتە 5ـی نیسانی هەموو ساڵێکەوە ڕایگەیاندووە، لەنێو ئەم منداڵانەدا نزیکەی 17 هەزار منداڵ هەن کە لە دایک و باوکیان بێبەش کراون.
لە بەیاننامەکەدا هاتووە، "ئەم منداڵانە لە دۆخێکی نالەباردا دەژین، زۆربەیان ناچارن پەنا بۆ چادرە دڕاوەکان یان ماڵە وێرانەکان ببەن، بە کردەوە دەستیان بە چاودێری کۆمەڵایەتی و پشتیوانی دەروونی نەگەیشتووە".
ئاماژەی بەوەشکردووە، ڕێژەی کوژراوانی منداڵان و ژنان لە هێرشەکانی ئیسرائیلدا "لەسەدا 60ـی کۆی قوربانییەکان"ی تێپەڕاندووە.
ئەوەشخراوەتەڕوو، ئەو دەستدرێژییە بووە هۆی شەهیدبوونی 50 هەزار و 21 فەلەستینی، لەنێویاندا 17 هەزار و 954 منداڵ، لەنێویاندا 274 منداڵی ساوا لەژێر بۆردومانەکەدا لەدایک بوون و شەهیدبوون، 876 منداڵی خوار تەمەنی یەک ساڵ، 17 منداڵ کە بەهۆی سەرما لە چادرەکانی ئاوارەکان گیانیان لەدەستداوە، 52 منداڵیش بەهۆی برسێتی و بەدخۆراکی سیستماتیکی گیانیان لەدەستداوە لە کەرتی غەززە.
بەگوێرەی ڕاگەیاندراوەکە، لە کەرتی ڕۆژئاوا 923 هاووڵاتی شەهید بوون کە 188 منداڵیان هەیە، ئەمە جگە لەوەی 660 منداڵیش لە سەرەتای دەستدرێژیی ئیسرائیلەوە تا ڕۆژی دەرکردنی ئەم بەیاننامەیە برینداربوون.