وادەی جەنگە خوێناوییەکەی ئێران و ئەمریکا راگەیەندرا

نها نیوز - هەواڵەکان

رۆژنامەی واشنتۆن پۆست وادەی هێرشەکەی ئەمریکا و ئیسرائیل بۆسەر ئێران ئاشکرا دەکات و ئامانجەکەش دامەزراوە ئەتۆمیەکە دەبێت.
 
رۆژنامەی "واشنتۆن پۆست" لە راپۆرتێکدا رایگەیاندووە "ئەگەری زۆرە ئەمریکا و ئیسرائیل لەنیوەی یەکەمی ئەمساڵدا، کەمتر لە سێ مانگی داهاتوو، هێرشی سەربازی بۆسەر ئێران ئەنجام بدەن.

ئەوەشی ئاشکراکردووە "حکومەتەکەی بنیامین ناتانیاهۆ، خواستی خۆی دەربڕیوە بۆ بەشداریكردن لە هێرشەکەی سەر ئێران".

هەر بەگوێرەی واشنتۆن پۆست، هەواڵگری ئەمریکا پێشبینی كردووە، لەنیوەی یەکەمی ئەمساڵدا هێرشە سەربازییەكە ئەنجام بدرێت.

لەلایەکی دیکەشەوە سەرچاوە سەربازییەکانی ئەمریکا جەختیان لەو هەواڵانە كردووتەوە، کە باس لە جێگیرکردنی تیمێك لە فڕۆکەی تارمایی بۆمبهاوێژی جۆری بی-2 دەكەن، لە بنكەی دیێگۆ گارسیا، كە بنکەیەکی دەریاییە لە دوورگەیەکى لە زەریای هیندی.

جێی باسە، فڕۆکەی بی-2 دەتوانێت زۆرترین بڕی تەقەمەنی هەڵبگرێت كە توانای خاپوركردنی پێگە زۆر توندوتۆڵەكانی هەیە و، پێدەچێت توانای تێكشكاندنی دامەزراوە ئەتۆمییە ژێرزەمینییەکانی ئێرانی هەبێت،  وێڕای ئەوەی ئەو فرۆكانە توانای هاویشتتنی موشەكی زۆر ورد و ئاڕاستەكراویان هەیە لەگەڵ چەكی ئەتۆمی.

رۆژنامەی دەیلی مەیلی بەریتانی رونیشیکردووەتەوە "لەگەڵ هەڵكشانی بەردەوامی قسە و لێدوانی نێوان ئەمریکا و ئێران، بەرپرسانی ئەمریکا و ئیسرائیل باسیان لە ئەگەری بە ئامانجگرتنی ئێران کردووە لە هەفتەکانی داهاتوودا.

هەر لەوبارەیەوە ئەو بەرپرسانە بە رۆژنامەكەيان وتووە "واشنتۆن و ئیسرائیل پلانیان هەیە بۆ هەڵكشانێكی نزیك کە پلانی بۆ دادەڕێژن، رەنگە بگاتە ئاستی گورزێكی گەورە دژی تاران".

هاوکات، ئەم هەڵکشانە بەوتەی بەرپرسان، لەچەند هەفتەی داهاتوودا روودەدات و ئامانجەکەش، دامەزراوە ئەتۆمییەکانی ئێران دەبێت لەرێگەی هێرشی ئاسمانی فراوانەوە.