نها نیوز - هەواڵەکان
بەگوێرەی پێگەی ئەكسیۆسی ئەمریكی، ئیدارەی ترەمپ دانوستانی ناڕاستەوخۆ لەگەڵ ئێران رەتناكاتەوە و كۆكردنەوەی هێزیش لە ناوچەكە لەلایەن واشنتۆنەوە بۆ چاوترساندنی ئێرانە.
پێگەی ئەكسیۆسی ئەمریکی لەزاری دوو بەرپرسی ئەو وڵاتەوە بڵاویدەکاتەوە، تاوەكو ئێستا كۆشكی سپی خەریكی گفتوگۆی ناوخۆییە لەنێوان ئەوانەی كە پێیانوایە ئەگەری هەیە لەگەڵ ئێران بگەنە رێككەوتن لەلایەك و ئەوانەی كە پێیانوایە دانوستان لەگەڵ ئێران كات كوشتنە و پشتیوانی لە وەشاندنی گورزی سەبازی لە دامەزراوە ئەتۆمییەكانی ئەو وڵاتە دەكەن.
لەمیانی ئەمەدا وەزارەتی بەرگریی ئەمریكا دەستی كردووە بەناردنی هێز و كەرەستەی سەربازی زۆر بۆ ناوچەكە.
یەكێك لە بەرپرسە ئەمریكییەكان بە ئەكسیۆسی وت "لە پشووی كۆتایی هەفتەدا، وەڵامی فەرمی ئێران بۆ نامەكەی ترەمپ، گەیشووەتە دەستی سەرۆكی ئەمریكا".
وتیشی "ترەمپ پێشنیاری ئەنجامدانی دانوستانی راستەوخۆی لەگەڵ ئێران كردووە، بەڵام ئێرانییەكان داوای دانوستانی ناڕاستەوخۆ بەنێوەندگیری عومان دەكەن".
هەر بەوتەی ئەو بەرپرسە ئەمریكییە "ئیدارەی ترەمپ پێیوایە دانوستانی راستەوخۆ لەگەڵ ئێران سەركەوتوتر دەبێت، بەڵام ئەو شێوازی دانوستانەش رەتناكاتەوە كە لەلایەن ئێرانەوە پێشنیاركراوە و دژی ئەوەش نییە كە عومان بە رۆڵی نێوەندگیریی لەنێوان هەردوو وڵات هەڵبسێت".
لەلایەکی دیکەوە هەردوو بەرپرسە ئەمریكییەكە بەهەمان پێگە دەڵێن "تاوەكو ئێستا كۆشكی سپی هیچ بڕیارێكی نەداوە و گفتوگۆ ناوخۆییەكانی كۆشك بەردەوامن". هەروەها یەكێكیان وتوشیەتی "لەدوای گۆڕینەوەی نامەكان، ئێستا كاتییەتی هەنگاوەكانی داهاتوو بۆ دەستپێكردنی دانوستانەكان و دروستكردنی متمانە لەگەڵ ئێرانییەكان ببینین".
ئەوەش لەكاتێكدایە دوای ئەوەی ترەمپ رۆژی یەكشەممەی ئەم هەفتەیە رایگەیاند، ئێران بۆردومان دەكرێت ئەگەر لەگەڵمان نەگاتە رێككەوت، لێدوانەكانی نێوان تاران و واشنتۆن دژبەیەكدی توندییان بەخۆوە دیوە.
جێی ئاماژەشە، رۆژی دووشەممە عەلی خامنەیی رێبەری باڵای كۆماری ئیسلامی ئێران لە وەڵامی لێدوانەكانی ترەمپدا وێڕای ئەوەی بەدووری زانی ئەمریكا هێرشبكاتە سەر ئێران بەڵام وتی "لە ئەگەری هێرشدا وەڵامی توندمان دەبێت".
هەروەها ئێران بەفەرمی یاداشتی ناڕەزایەتی خۆی دایە باڵیۆزخانەی سویسرا لە تاران، ئەوەش بەهۆی نەبوونی پەیوەندیی دیپلۆماسی لەنێوان ئەمریكا و وڵاتەکەی. لە یاداشتەكەیدا تاران هۆشداریدا كە وڵاتەکەی بەتوندی و خێرا وەڵامی بۆهەر هەڕەشەیەك دەبێت.
هەروەها فەرماندەی سوپای پاسدارانی ئێران لە لێدوانێكدا بۆ میدیای رەسمی وڵاتەكەی رایگەیاند "ئەمریكا 10 بنكە و 50 هەزار سەربازی لەناوچەكە هەیە، ئەوەی ماڵی لە شوشەیە بەرد ناگرێتە ماڵی كەس".
لایخۆشیەوە عەلی لاریجانی، راوێژكاری خامنەیی دەڵێت "ئەگەر ئەمریكا بۆردومانی دامەزراوە ئەتۆمییەكانی ئێران بكات، ئەوا ئێران لەژێر گوشاری رای گشتیدا ناچار دەبێت سیاسەتی خۆی بگۆڕێت و پەرە بە چەكی ئەتۆمی بدات".
هەروەها وەزارەتی بەرگریی ئەمریكا دوێنێ سێشەممە رایگەیاند، وڵاتەكەی هێز و كەرەستەی سەربازیی زیاتر لەرێگەی ئاسمانەوە بۆ ناوچەكە دەنێرێت.
هەفتەی رابردووش پنتاگۆن چەند فڕۆكەیەكی جۆری بی 2ی بۆ بنكەی دیگۆ گارسیای سەربازی لەنێو دەریای هیندی رەوانە كرد.
هەر لەوبارەیەوە یەكێك لەبەرپرسە ئەمریكییەكان بە ئەكسیۆسی وتووە "ترەمپ نایەوێت لەگەڵ ئێران بچێتە شەڕەوە، بەڵام پێویستی بەكۆكردنەوەی هێزی سەربازییە لەپێناو چاوترساندنی ئێران لە دانوستانەكان و ئامادەكاریی بۆهەر جوڵەیەك لە ئەگەری شكستی دانوستانەكان و گرژبونی لەناوكاوی دۆخەكە".