نها نیوز-هەواڵەکان
دوابەدوای نزیکبوونەوەکەی مانگێک لەمەوبەری نێوان هێزەکانی سووریای دیموکرات و ئیدارەی نوێی دیمەشق، ڕێککەوتنێکی نوێ لە نێوان هەردوولا سەبارەت بە دوو گەڕەکی دیار لە شاری حەلەب، کە زۆرینەی کورد تێیدا نیشتەجێیە، هاتە ئاراوە.
ئەمڕۆ سێشەممە، 1ـی نیسان، 2025، ڕێککەوتنێکی کاتی بۆ کشانەوەی هێزە کوردییەکان لە گەڕەکی شێخ مەقسوود و ئەشرەفیە لە شاری حەلەب، ئەنجامدراوە.
هەروەها هەردوولا ڕێککەوتن لەسەر ئازادکردنی دەستگیرکراوەکان و پاراستنی دامەزراوە مەدەنییەکانی ئێستا لە هەردوو گەڕەکەکە.
هەردوولا ڕێککەوتوون لەسەر کارئاسانی جووڵە لە نێوان هەردوو گەڕەک و ناوچەکەکانی باکووری ڕۆژهەڵاتی سووریا کە ناوچەیەکی بەرفراوانە و لە ژێر دەسەڵاتی هێزەکانی هەسەدە دایە.
ئەم هەنگاوە دوای نزیکەی مانگێک دێت لە ئیمزاکردنی ڕێککەوتنێک لە نێوان مەزلوم عەبدی فەرماندەی هێزەکانی سووریا و ئەحمەد شەرع سەرۆکی سووریا بۆ تێکەڵکردنی هێزە کوردییەکان لە سوپای نوێی سووریادا.
جێگای سەرنجە ئەم دوو گەڕەکە لە کانوونی دووەمی ساڵی ڕابردوو (2024) دووڕیانێکیان دروست کرد دوای ئەوەی کوتلە چەکدارەکان لە ئیدلیبەوە بەرەو حەما و حەلەب و پارێزگاکانی دیکە هێرشێکی لەناکاویان دەستپێکرد، دواتر ڕێککەوتنکرا گرووپە چەکدارەکان نەچنە ناویانەوە، و هێزەکانی هەسەدە بمێننەوە.