نها نیوز - هەواڵەکان
سەرۆکایەتى کۆمارى سوریا رایدەگەیەنێت، ئەحمەد شەرع سەرۆکی قۆناغی راگوزەری و مەزڵوم عەبدی، فەرماندەی هێزەکانی سوریای دیموکرات (هەسەدە) رێككەوتننامەییەکیان واژۆكرد بۆ تێکەڵکردنی هێزەکانی سوریای دیموکرات (هەسەدە) لە دامودەزگاکانی کۆماری عەرەبیی سوریا و جەختکردنەوە لەسەر یەکپارچەیی خاکی سوریا و رەتکردنەوەی دابەشبوون.
دەقی رێککەوتنی مەزڵوم عەبدی و ئەحمەد شەرع…
*دەستەبەکردنی مافی هەموو سوورییەکان بۆ نوێنەرایەتیی و بەشداریکردن لە پرۆسەی سیاسیی و هەموو دامودەزگاکانی دەوڵەت لەسەر بنەمای لێهاتوویی، بەبێ گوێدانە پاشخانی ئایینیی و نەتەوەیی.
*پێکهاتەی کورد پێکهاتەیەکی رەسەنە لە دەوڵەتی سووریا، دەوڵەتی سووریایش مافی هاوڵاتییبوون و هەموو مافەکانی دیکەی زامن دەکات.
*بەرقەرارکردنی ئاگربەست لە هەموو ناوچەکانی سووریا.
*تێکەڵکردنی سەرجەم دامودەزگا مەدەنیی و سەربازییەکانی باکوور و رۆژهەڵاتی سووریا بۆ ناو ئیدارەی دەوڵەتی سووریا، لەوانە؛ دەروازە سنوورییەکان و فڕۆکەخانەکان و کێڵگە نەوتیی و گازییەکان.
*گەڕانەوەی سەرجەم ئاوارەکان بۆ زێدی خۆیان و زامنکردنی ئاسایشیان لەلایەن دەوڵەتی سووریاوە.
*پاڵپشتیکردنی دەوڵەتی سووریا لە شەڕی دژی پاشماوەکانی ئەسەد و هەموو هەڕەشەکانی سەر ئاسایش و یەکڕیزیی سووریا.
*رەتکردنەوەی داوای بەشبوونی سووریا و گووتاری رقاویی و هەوڵدان بۆ بڵاوکردنەوەی ناتەبایی لەنێوان سەرجەم پێکهاتەکانی سووریا.
*لیژنەی جێبەجێکردن کاردەکەن و هەوڵدەدەن تا کۆتایی ئەمساڵ رێککەوتنەکە جێبەجێ بکەن.