وتار

لەیادی تاوانی شەنگال، بۆئەوەی لەبیرنەکرێن

دێرین عزەدین

ڕۆژی ٣ی ئاب، شەش ساڵ تێپەڕ دەبێت بەسەر هێرشی تیرۆریستی داعش بۆ سەر كۆمەڵگەی ئێزدی لە شەنگال‌ و ناوچەكانی دەوروبەری، لەو پەلامارە دڕندانەیەدا، هەزاران مرۆڤ تێیدا بوونە قوربانی، ژن ‌و منداڵ ‌و كچ‌ و كوڕ بەبێ هیچ تاوانێك.

كۆمەڵەی ئێزیدی لەو تاوانە مێژووییەدا (كوشتار گەل) كران‌ و زۆرێك لە ژنان ‌و كچانیان كران بە سەبایا‌ و لە بازاڕی (كۆیلە فرۆشان )كڕین ‌و فرۆشتنیان پێوە كرا.

شەش ساڵ لەمەوبەر لەكاتێكدا خەڵكی شەنگال‌ و دەوروبەری خەریكی ژیانی ئاسایی خۆیان بوون، لە پلانێكی غافڵگیرانەدا، جینوسایدێكی ئاشكرا كران‌ و شارێكی گەورەی پر دانیشتوان ‌و دەوروبەری بوونە نێچیری درندەیی هێزێكی وەكو داعش، كەتیایدا بەهەزاران ئینسان كوشتاركران‌و بەهەزارانیان دیلكران‌و ژنان‌و كچانیان كران بە كەنیزەك.

ئەمڕۆ دوای شەش ساڵ، بە سەدان هەزار خێزانی ئێزیدی هێشتا لە كەمپەكانی پەنابەریدا لە بارو دۆخێكی زۆر خراپ ‌و دژواردا دەژین، هێشتا بەسەدان‌ و هەزاران كەس چارەنووسیان نادیارەو بەسەدان ژن ‌و كچ لای خەلیفە ‌و چەكدارانی داعشن، یان مامەڵەیان پێوەدەكرێت. 

هێشتا بەهەزاران كەسیان ئاوارەن .

برینی ئەم روداوە، لە قوڵایی روح ‌و جەستەی هەموو ئینسانێكی بەئەمەك‌ و ویژدان زیندوودا بۆ ئەبەد دەمێنێتەوە، چ كورد وەك بەشێك لە مێژووەكەی، چ مرۆڤ وەك بەشێك لە تاوانی دژ بە مرۆڤایەتی‌و مێژووی مرۆڤایەتی.

لەو رۆژەدا پێویستە بۆ جارێكی تر دەنگی هەزاران ژنی یەزیدی‌و مەسیحی‌و كورد‌و عێراقی‌و سوری كە كەوتنە بەر شاڵاوی جینۆسایدی داعش، دەنگی ئازار‌و ئەشكەنجە‌و مەرگی دەرونی بەدنیا بگەیەنین.

پێویستە كارەساتی یەزیدیەكان وەك كارەساتی هەڵەبجەو ئەنفال، ویژدانی خەڵكی كوردستان بهەژێنێت‌و ماف‌و ئازادیەكانی خەڵكی یەزیدی وەك ماف‌و ئازادی بەشێك لە خەڵكی كوردستان تەماشا بكرێ‌و لەو پێناوەدا سەرجەم خەڵكی ئازادیخوازی كوردستان بەبێ لەبەرچاوگرتنی جیاوازی ئایین‌و بیروڕا‌و كلتور، كار بۆ ڕزگاركردنی یەزیدیەكان‌و گێڕانەوەی ماف‌و ئازادی‌و گوزەرانیان بكەین.

كوردستان وەك خاك‌و دانیشتوانەكەی وەك نەتەوە، نەتەوەش وەك تەواوی پێكهاتەی ئاینەكان، پێكەوە دەبین‌و دەژین، كوردستان بە شەنگال بوو بە یەكەم شوێنی پێناسەی ڕەفتارە وەحشیگەریەكانی داعش‌و هەروەك بوو بە یەكەم شوێنی شكاندنی تەلیسمكانیان.

تاوانی جینۆسایدی شەنگال هەرگیز لێخۆشبون هەڵناگرێت‌و دەبێت هەموو تۆمەتبارانی ئەم كارەساتە دوور یان نزیك لە دادگای نێودەوڵەتیدا، دادگایی بكرێن، بۆ ئەوەش پێویستە كورد وەك دەسەڵات‌و وەك نەتەوەش كاری لەسەر بكات‌و چیدی نەیخاتە بەردەم لافاوی فەرامۆش كردن وەك گشت ئەو تاوانانەی تر كە لە مێژوودا بەرامبەر بە گەلەكەمان كراوە


ژمارەی خوێنەر   ‌ 189‌
8/3/2020 2:02:06 PM
زیاتر...