بە پێی دەستور سەرۆکی کۆمار پارێزەری دەستورە، بەڵام وابزانم سەرۆک کۆماری ئێمە خەوتوە، بۆیە ئەڵێم خەوتوە چونکە چەندین مادەی دەستوری پێشێڵکراوە، جەنابیان یەکهەڵوێستیشی دەرنەبریوە، هەر تەنها جارێک نەیپرسیوە بۆ؟!، باشە ئاشکرایە کە پۆستی سەرۆک کۆمارت بەشێوەی کۆتا و بەتوافوق وەرگرتوە، خێرە ئێستا لە ئاست ئەو نادادی و زوڵمانەی لە پێکهاتەکان دەکرێت بێدەنگی، باشە سەرۆک کۆماری هەموو عێراقی یان تەنها خۆت بە نوێنەری لایەنێکی سیاسی دەزانی؟،
خەڵکی کوردستان پێویستی بە سەرۆک کۆمارێکی ڕاستەقینەیە نەک ئاوا خەمسارد بێت لە سەرجەم ئەو کێشە و ئاریشانەی بۆ هەرێم و حکومەتەکی دروست دەکرێت و یەک قسە چیە نەیکەی، لەبارەی مووچە و شایستە داراییەکانی هەرێم ئەرکی سەرشانی جەنابتە بێیتە سەر خەت و بەرگری لەو مادە دەستورییانە بکەی کە دەسەڵاتەکانی هەرێمی کوردستانی دیاریکردووە، لە جەنابت دەپرسم ئاگاداری رەوشی مووچەخۆران لە هەرێم چۆنە؟، ئەگەر هەستی نیشتمانیت هەیە کێشەی کوردستان لە سەر ئەستوی بەرێزتانە وەک سەرۆک کوماری عیراق، ئەگەر  فەرمانبەرانی هەرێمی کوردستانیش هەر هاوڵاتی عێراق بن؟.

ئایا بەرێزتان ئاگاداری چ غەدرێکی گەورە لە پێکهاتەکان کراوە، چەندینجار هاوارمان بۆ جەنابت کرد کە بەئەرکی دەستوری خۆت هەڵسی و نەهێڵی لە وڵاتەکەت پێکهاتەکان لە پەرلەمان و بەشداری سیاسی بێ بەش بکرێن، ئاوا پارێزەری دەستور دەکەی؟ ئاوا بەرگری لەسەرجەم پێکهاتە و هاولاتیانی عێراق دەکەی؟، بۆیە کاتی ئەوە هاتوە وەک پێکهاتە نەتەوەییەکان بپرسین ئایا پێکهاتەکان فەراموش کراون و  ژیانیان لە عێراق کۆتایی هاتوە؟ ئایا رێپێدراوە پێشێڵی دەستور بکرێت و لەرێی دادگاوە پێشێڵی مافی پێکهاتەکان بکرێت و رەوشی پێکەوەژیانی ئاشتیانەی نێوان پێکهاتەکان نەهێڵدرێت،  باشە لە جەنابی سەرۆک کۆمار دەپرسم ئەگەر ئێستا لەسەر ئەو ئەو هەموو کێشە و پێشێڵکردنی مادە دەستوریەکان قسە نەکەی ئەی کەی قسە دەکەی؟.