لەم رۆژگارە سەختەدا، کاتێک خەڵک متمانەی بە سیاسەت نەماوەو لە بەڵێنە بەتاڵەکان بێزار بوون و شەقام پڕبوە لە قسەو وتاری پوچ، خەڵکی هیچ کاندیدێکیان بەدڵ نییە، چونکە رابردوو بۆتە پەندو ئەزمون بۆیان. کەچی لەو کاتانەداو لەو تەم و تاریکییەدا، تیشکی ئومێدێک دەبینن، کەسایەتییەکی دەگمەن دەردەکەوێت، کەسێک کە بوونی ئارامیی و کەرامەت و متمانە بە داهاتوویەکی باشتر دەهێنێت.
سروشت جەناب ڕەمزی تەنها کاندیدێکی ئاسایی نییە.

ئەو ژنێکی سەنگین و بەشکۆو پڕ زانیاری و دڵسۆزە، هەرگیز ناتوانرێت ساختە بکرێت. پارێزەرێکە کە ناوبانگی خۆی لەسەر ڕاستی و بەرپرسیارێتی و خزمەتکردنی خەڵک بونیاد ناوە. هێزی ئەو ژاوەژاو نییە، هێزی ئەو کارکردنیەتی.

ئەوانەی خاتو سروشت دەناسن، دەزانن بۆ سەرسامکردن قسە ناکات؛ ئەو قسە بۆ چارەسەرکردن دەکات. بە دەسەڵاتەوە نانازێ؛ بە جێبەجێکردنی ئەرک و کارەکانییەوە سەرقاڵە. هەرگیز سروشت شوێن بەرژەوەندییەکان نەکەوتوەو ناکەوێت؛ ئەو بنەماکان پەیڕەو دەکات.

ڕاستییەک هەیە کە دەبێت بە ڕاستگۆییەوە بگوترێ:
دەنگی کەسێک کە بە ڕوونی دەبینێت، یەکسانە، لەسەر کاغەز، بە دەنگی کەسێک کە لە بەهای نوێنەرایەتی تێناگات. واتە لە دەنگداندا جیاوازی نییە لە نێوان زاناو نەزاندا.. ئەمە یەکێکە لە واقیعە بە ئازارەکانی هەڵبژاردنەکان، واقیعێک کە ناتوانرێت بگۆڕدرێت.

بەڵام ئەوەی دەتوانرێت بگۆڕدرێت ئەوەیە کە بڕیار دەدەین متمانە بە کێ بکەین.
هەر دەنگێک کە دەدرێت بە کاندیدێکی بەتواناو دڵسۆزو شارەزا، دەبێتە زیاتر لە ژمارەیەک.

هەر دەنگێک بۆ سروشت جەناب ڕەمزی بەهای سەد دەنگی هەڵدەگرێت، چونکە دەنگدانێکە بۆ دادپەروەری، بۆ حیکمەت و بۆ داهاتوویەک کە بە لێهاتوویی لە قاڵب دراوە نەک ئاژاوە. ئاخر ئەوانەی دەنگ بە سروشت دەدەن، دەزانن بۆچی سروشت گرنگە، لە نوێنەرایەتی راستەقینە دەگەن، هەست بەوە دەکەن، کورد پێویستی بە سروشتەکانە لە بەغدا نوێنەریان بن.
ئەمڕۆ لە هەموو کاتێک زیاتر پێویستمان بە نوێنەرێکە کە شەرەف بۆ پۆستەکە بهێنێت، نەک قورسایی بۆ گیرفانی خۆیان.

ئێمە پێویستمان بە کەسانێکە کە لە یاسا تێبگەن، ڕێز لە خەڵک بگرن، کە پێیانوایە خزمەتکردنی میللەت ئیمتیاز نییە، ئەوە بەرپرسیارێتییەکە. کتومت وەک سروشت خان، کە یەکێکە لەو کەسە دەگمەنانە.
زۆر گرنگە ئەوانەی شایەنی سەرکردایەتین، دەرفەتی خزمەتکردنیان پێ بدرێت.

ئەوانەی چاویان پێی کەوتووە، ڕێزی ئەو لە چاوی خۆیاندا هەڵدەگرن.
ئەوانەی لەگەڵیدا کاریان کردووە، دادپەروەرییەکەی لە چیرۆکەکانیاندا هەڵدەگرن.
ئەوانەی داوای ئامۆژگارییان کردووە، حیکمەتی ئەو لە ژیانیاندا هەڵدەگرن.
ئەو جۆرە کەسەیە کە پێش ئەوەی قسە بکات گوێ دەگرێت. پێش ئەوەی کار بکات بیردەکاتەوە. ئەوانەی دەیناسن خۆشیان دەوێت، چونکە وەک دارێک گەشە کردوە کە سێبەرەکەی هی هەموو کەسێکە.
سروشت خان سروشتی بەوجۆرەیە کە بەڵێنی قەبە نادات، بەڵێنێک دەدات کە سەد لە سەد جێبەجێی دەکات. ئەو سەلماندویەتی کە دڵسۆزی بەهای زیاترە لە هەزار وتار.
ئەو بە ژاوەژاوەوە ناڕوات، بە ئامانجەوە دەڕوات. بەهێزەوە هەنگاو دەنێت.

کاتێک باسی دادپەروەری دەکات، ئەوە دروشم نییە، بەڵکو دەنگی پارێزەرێکە کە ئەزمونی کردوە. کاتێک باسی کۆمەڵگا دەکات، ئەوە تیۆری نییە، دڵی ژنێکە کە لەگەڵ کۆمەڵگاکەیدا وەستاوە، ڕۆژ لە دوای ڕۆژ، بەبێ کامێرا، بەبێ چەپڵە، بێ خۆنواندن، بەردەوام خزمەتیکردوە، بێ فیزو بێ خۆ بەگەورە نواندن، کە لە راستیدا ئەو زۆر گەورەیە.
ئەو کەسانەی سەرسامن پێی، گروپێک و حزبێک و چینێک نین.

ئەوان دایکن کە متمانەیان بە ئارامییەکەی هەیە. ئەوان گەنجن کە هیوا لە دیسیپلینەکەیدا دەبینن.
ئەوان گەورەکانن کە کەرامەت لە ڕەفتارەکانیدا دەبینن. ئەوان کرێکارن کە هەوڵدان لە دەستی ئەودا دەبینن. ئەوان تێگەیشتون کە ڕوونی لە بیرۆکەکانی ئەودا دەبینن. ئەوان هاوڕێکانین کە دڵسۆزی تەواو لەودا دەبینن، ئەو ئەسڵی وەفایە.

ئەم قسانە بۆ ریکلام نییە بۆ خاتو سروشت، بەڵکو ئەوە ڕاستگۆیی ئەوە، ئەو مانایانەی بەدەست هێناوە. ئەوەی دەیناسێت گەر بە قسەکانی من بڵێت وا نییە، من داوای لێبوردن لە هەموو کەس دەکەم، بەڵام من لەوە دڵنیام کە بەم نوسینە نەمتوانیوە حەقی بدەمێ، بگرە ئەو زۆر بەرزترو گەورەترە، من بتوانم پیایدا هەڵدەم.

ئەمڕۆ، لە سەردەمێکدا کە مرۆڤەکان هەست بە ماندووبوون دەکەن لە ژاوەژاو، بێزارن لە ئاژاوە، بێزارن لەو کەسانەی کە تەنها بۆ قازانج دێن، من دەمەوێ بەوانەی بناسێنم کە نایناسن، کەسێکی وەک سروشت زیاترە لە کاندید. هاوڕێیە، لە تەنگانەدا لە پشتت وەستاوە، ئەو واتە هێزی بێدەنگ، دەستی پاک، دڵی کراوە. بەراستی ئەو کەسانەی خۆشیان دەوێت، شوێنکەوتووی کوێر نین.

ئەوان کەسانێکن کە دڵسۆزی دەناسن کاتێک دەیبینن. کەسانێک کە دڵیان کەرامەت هەڵدەبژێرێت، تەنانەت پێش ئەوەی مێشکیان شیکاری بکات.
سروشت کاندیدی ژمارەی (٢٤)، ئەو دەنگەیە کە خەڵک چاوەڕێی بیستنیەتی، ئەو پاکێتییەیە کە خەڵک بە دوایدا دەگەڕێت، ئەو نوێنەرەیە کە متمانە دروست دەکاتەوە. ئەو کەسەیە بە هەموو ژیانت پەشیمان نابیتەوە لەوەی کە متمانەی پێ بکەیت.