نهانیوز- هه‌واڵه‌كان
لیژنەی گواستنەوەو پەیوەندییكردنی پەرلەمانی عێراق داوای لە توركیا دەكات ئابڵوقەی سەر فڕۆكەخانەی سلێمانی هەڵبگرێت.
بەپێی راگەیەنراوێكی لیژنەی گواستنەوەو پەیوەندییكردنی پەرلەمانی عێراق، شەوی رابردوو لەپارێزگای بەسرە لیژنەیەیان لەگەڵ عەلی رەزا كۆنای باڵیۆزی توركیا لە عێراق و كونسوڵی بەسرەو وەفدێكی باڵای وەزارەتی گواستنەوەی توركیا كۆبونەتەوە.
گرنگی تەواوكردنی رێگای بوژانەوە رێگای گەشەپێدان كە لەڕێگای توركیاوە عێراق بەئەوروپاوە دەبەستێتەوە تەوەری سەرەكی كۆبونەوەكە بووە.
لەتەوەرێكی تری كۆبونەوەكەدا سەرۆك و ئەندامانی لیژنە داوایان لە باڵیۆزی توركیا كردوە هەوڵەكانی بخاتەگەڕ بۆ هەڵگرتنی ئابلۆقەی سەر فڕۆكەخانەی سلێمانی.
هەر لەوباریەوە زەهرە ئەلپەجاری سەرۆكی لیژنەكە رایگەیاند "وەك ئەركی لیژنەكەمان بەدواداچوونمان كردوەو فڕۆكەخانەی سلێمانی هیچ گرفتێكی تەكنیكی و كارگێڕی نیەو داوامكرد توركیا پێداچونەوە بەبڕیارەكانی سەبارەت بە فڕۆكەخانەی سلێمانی بكات".
دواتر پەرلەمانتار كاروان یاروەیس ئەندامی فراكسیۆنی یەكێتی لە لیژنەی گواستنەوەو پەیوەندیی كردن داوایكرد وەك دەستپێشخەرییەك بۆ قۆناغێكی نوێ پەیوەندییەكانیان لەگەڵ یەكێتی توركیا، ئابلۆقەی سەر فرۆكەخانەی سلێمانی لاببات، كە زیاتر هاووڵاتیان لێ زیانمەندن.
ئەو پەرلەمانتارەی فراكسیۆنی یەكێتی ئەوەشی وتوە "یەكێتی حزبی سەرۆك مام جەلالە كە ئەندازیاری ئاشتی و پەیوەندیی دۆستانەی نێوان توركیاو گەلی كوردستان بووە".