هەوایەكی سارد و كەشێكی فێنك هەرێم دەگرێتەوە

نهانیوز-هەواڵەکان

بارستە هەوایەکی سارد ڕوو دەكاتە هەرێم و شارەزایەكی كەشناسی دەڵێت: بەشێوەیەكی نائاسایی بۆ ئەم كاتەی ساڵ پلەكانی گەرما بە نزیكەی 12 پلە دادەبەزن.

ئاراس جەبار، شارەزای كەشناسی ڕایگەیاند"  پێشبینی ئەکرێت لە سەرەتای مانگی داهاتوودا لەنێوان 2/7/2025 بۆ 5/7/2025 بارستە هەوایەکی سارد لە ڕۆژهەڵاتی ڕوسیاوە بگاتە ناوچەکانی باکووری ئێران و هەرێمی کوردستان و عێراق".

ڕاشیگەیاند" کاریگەریەکانی لەسەر ناوچەکانی باکووری ئێران ئەبێت بە باران و کەشێکی سارد و لەناوچەکانی هەرێمی کوردستان بە چالاکبوونی بای بەهێز و فێنکی باکووری ڕۆژهەڵات کاریگەری ئەبێت".

وتیشی، “پێشبینی نزمبوونەوەیەکی نائاسایی بۆ ئەوکاتەی ساڵ لە پلەکانی گەرمادا دەکرێت بەنزیکەی 8 تا 12 پلە، کە ئەمەش کەشێکی زۆر فێنک لەناوچەکەدا دروست ئەکات، کە بۆ مانگی تەمموز تا ڕادەیەک دەگمەن و نائاسایی ئەبێت”.