سودانی لەگەڵ جێگری سەرۆکی ئەمریکا کۆبوەوە
نهانیوز- هه‌واڵه‌كان
نوسینگەی سەرۆک وەزیرانی عێراق بڵاویکردەوە، محەمەد شیاع سودانی سەرۆک وەزیرانی عێراق لە کۆنفرانسی میونشن چاوی بە کەمالا هارێس جێگری سەرۆکی ئەمریکا کەوت و کۆبونەوەیەکیان لەبارەی پەیوەندییەکانی بەغدا و واشنتن ئەنجامدا.
لە کۆبونەوەکە سودانی و هارێس گفوتگۆیان لەبارەی پەیوەندییە هاوبەشەکانی نێوان عێراق و ئەمریکا کرد و جەختیانکردوە لە بەردەوامی گفتوگۆکانی لیژنەی باڵای هاوبەشی بەغدا – واشنتن بۆ کۆتایی هێنان بە ئەرکی هێزی هاوپەیمانان، دوای هەڵسەنگاندنی هێزە چەکدارەکانی عێراق و کەمکردنەوەی مەترسییەکانی پاشماوەی تیرۆرستان.
هاوکات محەمەد شیاع سودانی سەرۆک وەزیرانی عێراق رایگەیاند، هەڵوێستی بەغدا لەبارەی سەروەری خاکەکەیەوە جێگیرە، چونکە بنەمای سەروەری، بنەمایەکە ناتوانێر لەژێر هۆکار و هەلومەرجی جیاواز پشتگوێ بخرێت یان فەرامۆش بکرێت.
لە هەمانکاتدا جێگری سەرۆکی ئەمریکا بەفەرمی محەمەد شیاع سودانی بانگهێشتکرد کە سەردانی واشنتن بکات و پشتگیری ئیدارەی وڵاتەکەی نیشاندا بۆ سەرخستنی حکومەتی عێراق لە بوارە جیاوازەکاندا و رووبەڕووبوونەوەی ئاستەنگییەکاندا.
|