پارتی بایکۆتی کۆبوونەوەی ئەنجوومەنی پارێزگای کەرکوک دەکات
نها نیوز – هەواڵەکان
ئەندامێکی فراکسیۆنی پارتی لە ئەنجومەنی پارێزگای کەرکوک ڕایگەیاند، بەشداریی کۆبوونەوەی ئەمڕۆی ئەنجومەنی پارێزگای کەرکوک لە هۆتیل ڕەشید لە بەغدا ناکەن. ده‌شڵێت "تائێستا بەفەرمی هیچ بانگهێشتنامەیەکمان بۆ نەهاتووە".
شۆخان حەسیب شوانی، ئەندامی ئەنجومەنی پارێزگای کەرکوک لە فراکسیۆنی پارتی دیموکراتی کوردستان دەڵێت "بەشداریی کۆبوونەوەی ئەنجومەنی پارێزگای کەرکوک لە هۆتیل ڕەشید ناکەین، چونکە دەبێت سەرۆکی بەتەمەنی ئەنجومەن کاتی کۆبوونەوە دیاریبکات و ئەو دەسەڵاتە هی ئەوە".
ناوبراو لە درێژەی قسەکانیدا باسی لەوەش کردووە، کە تائێستا بەفەرمی هیچ بانگهێشتنامەیەکیان بۆ نەهاتووە.
سبەینێ دوا وادەی دەستووریە بۆ پێکهێنانی ئیدارەی نوێی کەرکوک، پێشتر محەمەد شیاع سودانی، سەرۆک وەزیرانی عێراق بەجیا لەگەڵ هەریەکە لە پێکهاتەکان کۆبووەتەوە و پێی راگەیاندوون، کە پێویستە رێکبکەون و پارێزگارێک هەڵبژێرن، بەڵام تائێستا رێککەوتنەکە نەکراوە.
|