سەرۆکی پەرلەمانی عێراق گەیشتە شاری سلێمانی
ئاژانسی نھا: ژووری ھەواڵ
وەفدێکی باڵای عیراق بە سەرۆکایەتی محەمەد حەلبوسی، سەرۆکی پەرلەمانی عێراق، گەیشتە شاری سلێمانی و لەلایەن قوباد تاڵەبانی و لاھور شێخ جەنگی و فراکسیۆنی یەکێتی لەپەرلەمانی عیراق پێشوازیان لێکرا
لەو بارەیەوە حەسەن ئاڵی، ئەندامی فراکسیۆنی یەکێتی لە پەرلەمانی عێراق بە ئاژانسی نھا-ی ڕاگەیاند "کاتژمێر ٦ی ئێوارەی ئەمڕۆ محەمەد حەلبوسی سەرۆکی پەرلەمانی عێراق، بە یاوەری ژمارەیەک لەپەرلەمانتارانی پێکھاتەی عەرەب، گەیشتنە شاری سلێمانی".
وتیشی " محەمەد حەلبوسی و وەفدەکەی یاوەری، لەلایەن قوباد تاڵەبانی و لاھور شێخ جەنگی و فراکسیۆنی یەکێتییەوە لە فڕۆکەخانەی نێودەوڵەتی سلێمانی پێشوازیان لێکرا".
حەسەن ئاڵی ئاماژەی بەوەشکرد "بەگشتی سەرۆکی پەرلەمانی عێراق بەبۆنەی جەژنی نەورۆز و سەری ساڵی کوردییەوە سەردانی شاری سلێمانیان کردووە و بەشداری لە یادەکەدا دەکەن".
ئەوەشی ئاشکراکرد " سبەینێ محەمەد حەلبوسی و ھاوڕێیانی سەردانی بەرھەم ساڵح، سەرۆک کۆماری عێراق دەکەن و پاشنیوەڕۆی ھەمان ڕۆژ پێکەوە بە شاری سلێمانیدا دەگەڕێن و لەناو ھاوڵاتیاندا دەبن و بەشداری ئاھەنگی نەورۆز دەکەن".
|